Hytaýa wizasyz gelip-gidiş dünýä syýahatçylaryna täze mümkinçilikleri açýar
Hytaýa wizasyz gelip-gidiş düzgüni daşary ýurtly syýahatçylaryň ýurda gelmegini has aňsatlaşdyryp, syýahatçylaryň sanynyň barha artmagyna itergi berýär. Häzirki wagtda 76 ýurduň raýatlary, diňe Hytaýyň birtaraplaýyn rugsat bermegi ýa-da özara ylalaşyklar esasynda wizasyz gelip-gidip bilýärler. Ýene-de 55 ýurduň raýatlaryna, olar Hytaýdan üstaşyr geçip barýarka, başga bir ýurda ugramazyndan ozal, Hytaýda 10 güne çenli wizasyz bolmaga mümkinçilik berilýär.
Bu düzgüniň berýän netijesi Pekiniň esasy howa menzillerinde aýdyň görünýär. Migrasiýa gulluklarynyň maglumatlaryna görä, halkara uçarlaryň howa menziline iň köp gonýan wagtlary bir sagadyň dowamynda 3 müň 200 töweregi daşary ýurtly syýahatçy ýurda girýär, olaryň köpüsi Ýewropadan, Ýakyn Gündogardan we Günorta-Gündogar Aziýadan gelýär.
Hytaýda gyşky syýahatçylyk möwsümi başlandy, şonuň netijesinde buz we gar bilen baglanyşykly syýahatçylyk, taryhy ýadygärliklere we döwrebap şäherlere baryp görmek hem-de dürli aşhana medeniýeti bilen tanyşmak daşary ýurtly myhmanlary has gyzyklandyrýan ugurlardyr. Syýahatçylar wizasyz gelip-gitmek mümkinçiliginden peýdalanyp, Beýik Hytaý Diwary, Gadymy Köşk (Forbiddin Siti) ýaly meşhur ýerleriň, şeýle hem Şanhaý, Çendu, Guilin we Kunmin ýaly şäherleriň gözelliklerini synlap, gezelenç edýärler.
Resmi maglumatlar syýahatçylyk pudagynyň güýçli ösýändigini görkezýär. Şu ýylyň üçünji çärýeginde serhetden geçen syýahatçylaryň sany 178 milliona ýetip, geçen ýyl bilen deňeşdirilende 13 göterim töweregi artdy. Şol döwürde daşary ýurtly raýatlaryň wizasyz girişleriniň sany 7.2 milliondan geçip, ýyllyk hasapda 48 göterim ýokarlandy we ähli daşary ýurtly girişleriň 72 göteriminden gowragyny düzdi.
Bilermenleriň bellemegine görä, wizasyz gelip-gidiş düzgünleri adamlaryň arasyndaky gatnaşyklary pugtalandyrmaga, özara düşünişmäni ýeňilleşdirmäge hem-de syýasy, ykdysady we medeni hyzmatdaşlygy ösdürmäge möhüm goşant goşýar. Bu çäreler Hytaýyň daşary ýurtly myhmanlara öz gapysyny has giň açmak bilen, ýurdy ählumumy syýahatçylyk merkezine öwürmekde öňde goýlan maksatlara ýetmäge ýardam berýär.
