Hytaýda geçirilýän VEX Robotics Asia Open ýaryşlaryna 3500-den gowrak adam gatnaşýar
2025–2026-njy ýyllar üçin niýetlenen VEX Robotics Asia Open Signature Event açyk ýaryşyna, robot tehnikasynyň programmirleme, konstruksiýa gurmak we robotlary dolandyrmak ýaly toplumlaýyn başarnyklaryna bagyşlanan bu çärä, 30-a golaý ýurtlardan we sebitlerden 3500-den gowrak gatnaşyjy Pekine ýygnandy.
Hytaýyň paýtagtynyň Şiszinşan etrabyndaky Şougan seýilgähinde penşenbeden ýekşenbe gününe çenli geçirilen bu çäre çagalar bagyndan başlap uniwersitet derejesine çenli dürli ýaş toparlaryna degişli 600 topary özüne çekdi.
Aýratyn kategoriýalar dürli ýaşdaky okuwçylara mini-robotlary dolandyrmakdan başlap, çylşyrymly bäsdeşlik robotlaryny taslamaga çenli öz ukyp-başarnyklaryny görkezmäge mümkinçilik berýär.
«Biz olaryň örän güýçlüdigine ynanýarys. Şeýle güýçli toparlary öň görmändik, olaryň robotlary bolsa örän kämil derejede işleýär. Olardan köp zat öwrenip bileris diýip pikir edýäris we elimizden geleniň iň gowusyny etmäge synanyşarys», — diýip, Ispaniýaly gatnaşyjy Pol Serra Karner aýtdy.
VEX Robotics ýaryşlary köp ýurtlarda geçirilip, her ýyl millionlarça ýaşlary özüne çekýär. Olar ylym, tehnologiýa we innowasiýa ugurlarynda dünýäniň dürli künjeginden gelen ýaşlary birleşdirýän möhüm platforma öwrüldi.
«Bäsleşige Ýewropa, Demirgazyk Amerika, Günorta Amerika we Afrika ýaly ähli yklymlardan iň gowy toparlar gatnaşýar. Biz emeli aň senagatynyň ösüşi üçin täze zehinleri taýýarlamak maksady bilen, serişdeleriň utgaşdyrylmagynyň artykmaçlyklaryndan doly peýdalanýarys», — diýip, Pekinde ýerleşýän «Çžunguansun Şuçži» emeli aň senagaty bileleşiginiň baş sekretary Szýa Hao aýtdy.
Guramaçylar bu çäräniň diňe bir ýokary derejeli tehnologik bäsleşikleri däl-de, eýsem dünýäniň dürli künjeginden gelen ýaş gatnaşyjylaryň arasynda çuňňur medeniýetara alyş-çalyşlary hem höweslendirýändigini bellediler.
