Halkara kompaniýalary Hytaýa maýa goýumlaryny dowam etdirmegi göz öňünde tutýarlar
Hytaýyň Merkezi ykdysady iş maslahatynyň netijelerine laýyklykda dürli ugurlarda işleýän halkara kompaniýalarynyň Hytaýyň ykdysady geljegine ynamy artdy we ýurduň ykdysadyýetine maýa goýumlaryny artdyrmaga taýýardyklaryny mälim etdiler. Bu maslahatyň dowamynda 2026-njy ýylda ýokary hilli, aç-açanlyga we innowasiýalara esaslanýan ösüşi öňe sürmekligi hem-de ekologiýa taýdan arassa önümçilige geçmekligi maksat ediýän ykdysady işleriň esasy ugurlary kesgitlendi.
Merkezi ykdysady iş maslahatynyň netijeleri Pekinde geçirilen halkara kompaniýalaryň ýolbaşçylarynyň 15-nji Halkara tegelek stolunda giňden ara alnyp maslahatlaşyldy. Bu çärä Amerikanyň Birleşen Ştatlaryndan, Beýik Britaniýadan, Gazagystandan we beýleki ýurtlardan kompaniýa ýolbaşçylary hem-de söwda palatalarynyň wekilleri gatnaşdy. Çykyş edenler Hytaýyň aç-açanlyk syýasatynyň, özara bähbitli hyzmatdaşlygyň we täze hilli öndürijilik güýçleriniň ösdürilmeginiň halkara kompaniýalary üçin täze mümkinçilikleri döredýändigini bellediler.
Hytaýdaky Amerikan Söwda palatasynyň prezidenti Maýkl Hart Amerikanyň Birleşen Ştatlarynyň kompaniýalarynyň Merkezi ykdysady işler boýunça Maslahatyň netijelerine uly üns berýändigini aýtdy. Onuň bellemegine görä, 15-nji bäşýyllyk maksatnama bilen bagly strategiýalar daşary ýurt kompaniýalaryna Hytaýyň ykdysadyýetine uzak möhletleýin maýa goýmaklyga mümkinçilik döredýär. “Ykdysady taýdan açyklyga aýratyn ähmiýet berilmegi biziň üçin örän oňyn alamatdyr. Biz muňa maýa goýumlaryň dowam etdirilmegine berilýän mümkinçilik hökmünde garaýarys we kompaniýalarymyz Hytaýda ygtybarly bazar hökmünde hyzmatdaşlygyny dowam etdirerler” diýip, Maýkl Hart belledi.
Hytaý-Beýik Britaniýa Işewürlik Geňeşiniň direktory Kiran Patel hem geljekki hyzmatdaşlyk üçin Hytaýyň aýratyn ähmiýetli sebitler barada pikirini paýlaşdy. Onuň aýtmagyna görä, Beýik Aýlag atlandyrylýan sebitde, gündogar Hytaýda we Ýanszy derýasynyň sebitinde hyzmatdaşlygyň täze ugurlaryny synap görmek üçin amatly mümkinçilikler döreýär. “Biz bu ugurlary üns merkezinde saklamak bilen, 2026-njy ýylda ykdysadyýetiň bu pudaklarynda anyk öňegidişliklere garaşýarys” diýip, Kiran Patel belledi.
“Eurasia Group” maslahat beriş kompaniýasynyň başlygy Baltabek Mukaşew, oba hojalyk tehnologiýalary we enjamlary boýunça Hytaýyň dünýäde öňdebaryjy ýurtlaryň birine öwrülendigini belledi. Onuň pikirine görä, Hytaýyň öndürijileri diňe Gazagystan bilen çäklenmän, tutuş Merkezi Aziýa sebitine enjamlary hödürlemek bilen, hyzmat merkezlerini, diler söwda merkezlerini we degişli infrastrukturalary ösdürip bilerler. “Öňümizdäki bäş ýylyň dowamynda bu önümlere bolan islegler gitdigiçe artar” diýip, Baltabek Mukaşew aýtdy.
Albemarle China kompaniýasynyň prezidenti Sýu Ýan, Hytaýyň geljekde içerki sarp edijiligi ösdirmäge aýratyn üns berjekdigini aýtdy. Onuň sözlerine görä, awtomobiller, elektron enjamlary we robotlar ýaly täze önümçilikleriň ösmegi energiýa öndüriji batareýalara, akkumulýatorlara bolan islegi artdyrar, bu bolsa kompaniýa üçin amatly bazar bolar. Şeýle oňyn ýagdaýlar Albemarle kompaniýasyny ruhlandyryp, onuň Hytaýdaky bölümine 2025-nji ýylda 1 milliard ABŞ dollary möçberinde täze maýa goýumyny goýmaklygyna itergi berdi.
