Iň uzyn ýokary tizlikli demir ýol tuneli gazyldy
Çarşenbe güni Günorta-Günbatarda ýerleşýän Çongçin–Kumming ýokary tizlikli demir ýolunda Hytaýyň iň uzyn ýokary tizlikli demir ýolunyň Ýilýan tuneli doly gazylyp tamamlandy.
Ýunnan welaýatynyň Çaotong şäherinde ýerleşýän Ýilýan tuneliniň uzynlygy 24,8 kilometr, we ol sagatda 350 kilometr tizlige niýetlenendir. Häzirki wagtda ol Hytaýda demir ýol otlylarynyň iň ýokary tizlikde hereket edip biljek tuneli bolup durýar.
Tunel, geologik gurluşlarynyň çylşyrymlylygy bilen tanalýan Wumeng daglarynyň içinden geçýär. Şol sebitdäki çylşyrymly tektoniki we geologik şertler gurluşykçylara örän uly kynçylyklar döretdi.
"Daglyk basyşy we gaýalaryň partlama howpuny ýeňip geçmek üçin biz öňünden basyşy boşatmak usullaryny, dagyň içine beton sepmek, öňünden dartylan berkidiji tirsekleriň sanyny artdyrmak ýaly çäreleri gördük. Bu çäreler gurluşyk howpsuzlygyny kepillendirip, taslamanyň amala aşyrylmagyny netijeli üpjün etdi" diýip, Hytaý Demir Ýol Gurluşyk Köpri Inženerçilik Býurosynyň ýolbaşçysy Rao Şengbin habar berýär.
Umumy uzynlygy 700 kilometr bolan Çongçin–Kumming ýokary tizlikli demir ýolyň 388,6 kilometri Ýunnan welaýatynda ýerleşýär. Bu ýol welaýatda ilkinji gezek sagatda 350 kilometre çenli tizlikde ýol aşmaga niýetlenen ýokary tizlikli demir ýol bolup, häzirki wagtda onuň gurluşygynyň jemleýji tapgyry alnyp barylýar.
Taslama doly tamamlanandan soň, Çongçin bilen Kummingiň arasyndaky syýahat wagty takmynan iki ýarym sagada çenli gysgalyp, sebitiň aragatnaşyk mümkinçilikleri örän ýokarlanar hem-de geçelgäniň ugrunda ykdysady we durmuşy ösüşi höweslendirer.
