Hytaýda saglygy dikeldiş enjamlary kämilleşdirilýär
Hytaýda saglygy dikeldişde ulanylýan enjamlar gitdigiçe kämilleşdirilýär. Şeýle enjamlary öndürýän pudak ýokary tehnologiýaly aýratyn zerurlyklara niýetlenen enjamlaryň sanyny köpeldip, maýyplygy bolan adamlaryň durmuşyny ýeňilleşdirmäge kömek edýär.
Guanžou şäherinde inženerler ýokary tehnologiýaly tigirli kürsileriň täze görnüşlerini synagdan geçirýärler. Bu enjamlar kelläniň we gözleriň hereketleri arkaly dolandyrylýar. “Maýyplygy bolan adamlaryň aglabasy adaty el bilen dolandyrylýan tigirli kürsileri ulanyp bilmeýär. Şol ýagdaý hem biziň şu täze önümi döretmegimize itergi berdi,” diýip, kompaniýanyň wekili He Guanfeng düşündirdi. Tigirli kürsileriň täze görnüşleri Maýyplygy bolan adamlaryň 12-nji Milli oýunlarynda we 9-njy Milli ýörite Olimpiýa oýunlarynda hem ulanyldy.
Guandun welaýatynda öndürilýän täze görnüşdäki tigirli kürsileriň we ýöremäge kömek edýän ýörite enjamlaryň paýy tutuş ýurtda öndürilýän möçberiniň 50-60 göterimini, eksportyň bolsa 70 göterimini düzýändir. Bu pudakda ýönekeýje hereket etmäge kömek edýän gurallardan indi has ösen, adamlara has oňaýly “akylly” önümleriň önümçiligine geçildi. Foşan şäherindäki önüm öndürijiler adamlar üçin has amatly, gündelik durmuşda ulanmaga has oňaýly tigirli kürsileriň önümçiligine üns berýärler. “Munuň ölçegi maňa doly laýyk gelýär, ýokary tizlikli otlularyň içinde ýa-da jemgyýetçilik hajathanalaryndan ýeňillik bilen hereket edýär,” diýip, Žesiandan gelen Fan Siao gürrüň berdi.
Öňler ýokary tehnologiýaly tigirli kürsilerini diňe daşary ýurtlardan satyn alyp, getirmeli bolýardy, köplenç ýagdaýda bolsa olar biziň göwrämize laýyk hem gelmeýärdi. Pearl derýasynyň guýýan sebitindäki öňdebaryjy önümçilik Hytaý kompaniýalaryna özleriniň häzirki önümleriniň hilini has çalt gowulandyrmaga mümkinçilik berýär. Foşanly triatlonçy Žang Sian bolsa şahsy amatlyklary bolan tigirli kürsileriň öz durmuşynda has oňaýly we rahat bolandygyny aýtdy.
