Si Szinpin Makron bilen gepleşikleri geçirdi we hyzmatdaşlygy giňeltmäge çagyrdy
Hytaý we Fransiýa mümkinçiliklerden peýdalanmaly we hyzmatdaşlygyň gerimini giňeltmeli diýip, HHR-iň Başlygy Si Szinpin Pekinde Fransiýanyň Prezidenti Emmanuel Makron bilen geçiren gepleşikleriniň dowamynda aýtdy.
Si Szinpin Hytaýyň hemişe iki halkyň hem-de halkara bileleşiginiň uzak möhletleýin bähbitlerinden ugur alyp, deňhukukly esasda Fransiýa bilen hyzmatdaşlyk etmäge taýýardygyny belledi.
Si Szinpin Hytaýyň we Fransiýanyň awiasiýa, kosmos we ýadro energetikasy ýaly däp bolan ugurlarda hyzmatdaşlygy pugtalandyryp, şeýle hem ýaşyl we sanly ykdysadyýet, biofarmasewtika, emeli aň we täze energetika ýaly ugurlarda hyzmatdaşlygyň mümkinçiliklerini ulanyp, olardan peýdalanmalydygyny we gatnaşyklaryň gerimini giňeltmelidigini aýtdy.
Si Szinpin Hytaýyň Fransiýadan has köp ýokary hilli önümleri import etmäge taýýardygyny, Hytaýda has köp fransuz kärhanalarynyň ösmegini goldaýandygyny, şeýle hem Fransiýanyň hytaý kärhanalary üçin amatly we durnukly şertleri döretjekdigine umyt edýändigini aýtdy.
Si Szinpin taraplary medeniýet, bilim, ylym we tehnologiýalar ýaly ugurlarda, şeýle hem sebitara derejesinde alyş-çalyşlary we hyzmatdaşlygy berkitmäge çagyrdy.
Si Szinpin Hytaýy we Fransiýany Birleşen Milletler Guramasynyň esaslandyryjy agzalary we Howpsuzlyk Geňeşiniň hemişelik agzalary hökmünde BMG-nyň ýörelgelerine we halkara hukuk binýadyna esaslanýan halkara ulgamyny we düzgünlerini goldamaga, jedelleri syýasy ýol bilen çözmekde hem-de bütindünýä parahatçylygyny we durnuklylygyny üpjün etmekde özara gatnaşyklary we hyzmatdaşlygy pugtalandyrmaga, şeýle hem ähliumumy dolandyryşy özgertmäge we kämilleşdirmäge ýardam bermäge çagyrdy.
Si Szinpin Demirgazyk we Günorta ýurtlarynyň deň derejede ösmeýändigini we halkara maliýe institutlarynda ösüp barýan ýurtlaryň wekilçiliginiň ýeterlik däldigi ýaly dünýädäki köp sanly deňagramsyzlyklary belledi.
Si Szinpin Hytaý bilen Ýewropa Bileleşiginiň hyzmatdaşlyk ruhuna ygrarly bolmalydygyny, ony açyk garaýyş bilen ösdürmelidigini, şeýle hem Hytaý bilen ÝB-niň arasyndaky gatnaşyklaryň özygtyýarlygyny hem-de özara bähbitli hyzmatdaşlyk ýoly bilen ösdürmelidigini aýtdy.
Makron Fransiýanyň HHR bilen gatnaşyklara uly ähmiýet berýändigini, "Bitewi bir Hytaý" syýasatyny berk goldaýandygyny we iki ýurduň arasyndaky hemmetaraplaýyn strategik hyzmatdaşlygy çuňlaşdyrmaga taýýardygyny aýtdy.
Ol şeýle hem Fransiýanyň Hytaýyň ykdysadyýetiniň ýokary depgindäki ösüşini hem-de dünýäde täze mümkinçilikleri döredýän aç-açanlygy we hyzmatdaşlyga ygrarlylygyny goldaýandygyny belledi.
Makron Fransiýanyň Hytaý bilen özara maýa goýumlaryny ösdürmäge, söwda, gaýtadan dikeldilýän energiýa çeşmeleri we beýleki ugurlarda hyzmatdaşlygy pugtalandyrmaga, şeýle hem dostlukly medeni gatnaşyklara ýardam bermäge taýýardygyny aýtdy.
Makron şeýle hem hytaý kompaniýalarynyň Fransiýa goýýan maýa goýumlaryny oňlaýandygyny, öz ýurdunyň bolsa adalatly işewürlik gurşawyny üpjün etmäge taýýardygyny aýtdy.
Makron Fransiýanyň ÝB bilen Hytaýyň arasyndaky gatnaşyklaryň durnukly ösmegine ýardam bermäge ygrarlydygyny, dialoga we hyzmatdaşlyga eýermelidigine, ÝB-niň strategik özygtyýarlygyny gazanmalydygyny aýtdy.
Makron Fransiýanyň HHR-iň Başlygy Si Szinpiniň ähliumumy dolandyryşy özgertmek we kämilleşdirmek hem-de deňhukuly dünýä ykdysadyýetini ösdürmek baradaky garaýyşlaryny doly goldaýandygyny aýtdy.
Iki döwletiň baştutanlary Ukraina meselesi babatynda hem pikir alyşdylar. Si Szinpin Hytaýyň parahatçylyga ýardam berýän ähli tagallalary goldaýandygyny we bu gapma-garşylygyň syýasy ýol bilen çözülmegi ugrunda tagallalaryny dowam etdirjekdigini aýtdy.
Gepleşikleriň ahyrynda Si Szinpin we Makron ýadro energetikasy, oba hojalygy, azyk, bilim we ekologiýa ýaly ugurlarda hyzmatdaşlyk boýunça birnäçe resminamalara gol çekmek dabarasyna gatnaşdylar.
Şeýle hem iki ýurduň baştutanlary köpçülikleýin habar beriş serişdeleriniň wekilleri bilen bilelikde duşuşyklary geçirdiler.
