Hytaý COP31 konferensiýasynda ekosyýahatçylyk we ýaşyl ykdysadyýet boýunça taslamalaryny tanyşdyrdy
Hytaý Türkiýäniň Antalýa şäherinde geçirilýän BMG-niň COP31 klimat konferensiýasynda ekosyýahatçylyk, tebigy gurşawy dikeltmek we pes uglerodly ykdysadyýete geçmek boýunça taslamalaryny tanyşdyrdy. Tanyşdyryş 9-njy noýabrda, konferensiýanyň açylan güni geçirildi.
Hytaýyň pawilýonynda «Ekologik siwilizasiýa we gözel Hytaýy gurmagyň tejribesi» atly tematiki çäre guraldy. Onda ekologiýa we medeni syýahatçylyk ugurlaryny ösdürmek boýunça başlangyçlar görkezildi. Bu taslamalar adamlary daşky gurşawy goramak işleriniň netijeleri bilen tanyşdyrmaga we ekologiýa taýdan jogapkärçilikli durmuş ýörelgelerini wagyz etmäge gönükdirilendir.
ÝUNESKO-nyň Howanyň üýtgemegi boýunça bilim edarasynda halkara gatnaşyklar we kommunikasiýalar bölümine ýolbaşçylyk edýän Djian Sadadu Hytaýyň şäherlerde tebigy giňişlikleri dikeltmek we ykdysadyýeti howanyň üýtgemegine uýgunlaşdyrmak boýunça alyp barýan işlerini belledi.
Türkiýäniň Syýahatçylygy ösdürmek we mahabatlandyrmak agentliginiň baş direktory Sinan Seha Türksewen tanyşdyrylan taslamalarda beýleki ýurtlar üçin hem peýdaly bolup biljek amaly çözgütleriň bardygyny aýtdy.
Türkiýäniň öňki daşary işler ministri Mewlüt Çawuşoglu hem Hytaýyň halkara klimat hyzmatdaşlygyna, şol sanda ýaşyl energetikany ösdürmek arkaly goşýan goşandyny belledi.
20-nji noýabra çenli dowam etjek COP31 konferensiýasynyň çäklerinde Hytaýyň pawilýonynda 40-dan gowrak tematiki çäre geçirmek meýilleşdirilýär. Olar ekologik ösüş, klimat maliýeleşdirmesi, Global Günorta ýurtlarynyň hyzmatdaşlygy we täze energiýa çeşmeleri ýaly ugurlary öz içine alýar.
SSTV+-niň habar bermegine görä, COP31 konferensiýasyna dünýäniň 200-e golaý ýurdundan we sebitinden wekiller gatnaşýarlar. Konferensiýanyň esasy maksady halkara klimat borçnamalaryny anyk çäreler arkaly durmuşa geçirmekden ybaratdyr.
