Hytaýda täze energiýaly awtoulaglar oktýabr aýyndaky satuwlaryň 64,3%-ini emele getirdi, awtoulag eksporty 60% ýokarlandy
2026-njy ýylyň oktýabr aýynda Hytaýda satylan täze awtoulaglaryň 64,3%-ini täze energiýa çeşmelerini ulanýan ulaglar (NEV), şol sanda elektromobiller we elektrik ulgamyndan zarýad alyp bilýän gibrid awtoulaglar emele getirdi. Bu barada 11-nji noýabrda Hytaýyň awtoulag öndürijileriniň assosiasiýasy (CAAM) habar berdi.
Oktýabr aýynda ýurtda 3,063 million awtoulag öndürildi, 3,016 million awtoulag satyldy. Sentýabr aýy bilen deňeşdirilende önümçilik 2,5%, satuwlar 2% ýokarlandy. Emma geçen ýylyň degişli aýyna garanyňda bu görkezijiler degişlilikde 8,8% we 9,2% peseldi.
Täze energiýaly awtoulaglaryň bazary bolsa ösüşini dowam etdirdi. Olaryň önümçiligi 2,017 milliona ýetip, geçen ýylyň oktýabry bilen deňeşdirilende 13,8% artdy. Satuwlar 13,1% ýokarlanyp, 1,94 million awtoulaga ýetdi.
Oktýabr aýynda Hytaý 1,066 million awtoulag eksport etdi. Bu geçen ýylyň degişli döwründäkiden 60,2% köpdür. Şolaryň 606 müňüsi täze energiýaly awtoulaglar bolup, olaryň eksporty geçen ýylkydan takmynan 2,4 esse ýokary boldy.
2026-njy ýylyň ýanwar–oktýabr aýlarynda Hytaýyň awtoulag eksporty 9,271 million birlige ýetip, 65,1% artdy. Täze energiýaly awtoulaglaryň eksporty bolsa 4,612 million birlige ýetdi. Bu geçen ýylyň degişli döwründäkiden takmynan 2,3 esse köpdür.
CAAM-yň baş sekretarynyň orunbasary Çen Şihua häzirki wagtda täze energiýaly awtoulaglaryň Hytaýyň aýlyk awtoulag eksportynyň ýarysyndan gowragyny emele getirýändigini belledi. Onuň sözlerine görä, bu ösüş tehnologiýalaryň kämilleşmegi, önümleriň bäsdeşlige ukyplylygynyň ýokarlanmagy we daşary ýurtly alyjylaryň isleginiň artmagy bilen baglanyşyklydyr.
Çen Şihua 2026-njy ýylyň jemleri boýunça Hytaýyň awtoulag eksportynyň 10 milliondan geçjekdigini hem çaklady.
SSTV+-niň habar bermegine görä, elektromobilleriň we gibrid awtoulaglaryň daşary ýurtlara iberilişiniň artmagy Hytaýyň awtoulag eksportynyň ösüşinde möhüm orun eýeleýär.
