Hytaý Şençžende geçiriljek APEC sammitine taýýarlanýar: ýylyň dowamynda 300-den gowrak duşuşyk geçirildi
Aziýa–Ýuwaş umman sebiti dünýä söwdasynda we tehnologik ösüşde möhüm orun eýeleýär. Dünýä ykdysadyýetiniň ösüş depgininiň haýallaýan we halkara üpjünçilik zynjyrlary üçin töwekgelçilikleriň artýan şertlerinde sebit ýurtlarynyň we ykdysadyýetleriniň hyzmatdaşlygy aýratyn ähmiýete eýe bolýar.
3-nji noýabrda Aziýa–Ýuwaş umman ykdysady hyzmatdaşlygynyň (APEC) 37-nji ministrler duşuşygy wideoaragatnaşyk arkaly geçirildi. Duşuşykda guramanyň ykdysadyýetleriniň ýolbaşçylarynyň öňde boljak sammitine taýýarlyk meseleleri ara alnyp maslahatlaşyldy.
Maslahata Hytaýyň daşary işler ministri Wan I we söwda ministri Wan Wentao bilelikde başlyklyk etdiler.
2026-njy ýylyň noýabr aýynda Hytaýyň günortasyndaky Şençžen şäherinde APEC-iň ykdysadyýetleriniň ýolbaşçylarynyň 33-nji duşuşygy geçiriler.
Bu Hytaýyň sammiti üçünji gezek kabul etmegi bolar. Ozal şeýle duşuşyklar 2001-nji ýylda Şanhaýda we 2014-nji ýylda Pekinde geçirilipdi.
Şu ýylky sammitiň esasy mowzugy «Bilelikde gülläp ösmek üçin Aziýa–Ýuwaş umman bileleşigini döretmek» diýlip kesgitlenildi.
Hytaý 2026-njy ýylda APEC-iň çäklerindäki hyzmatdaşlygyň üç ileri tutulýan ugruny — açyklygy, innowasiýalary we hyzmatdaşlygy öňe sürdi.
Wan Iniň aýtmagyna görä, APEC-iň «Hytaý ýylynyň» dowamynda eýýäm 300-den gowrak duşuşyk we çäre geçirildi. Olaryň netijesinde hyzmatdaşlyk boýunça birnäçe ylalaşyk gazanyldy.
Hytaýyň daşary işler ministri öňde boljak sammitiň Aziýa–Ýuwaş umman sebitiniň geljekki ösüşi üçin möhüm ähmiýete eýedigini belledi.
Ol gatnaşyjylary özara hormaty berkitmäge, sebit ykdysady integrasiýasyny çuňlaşdyrmaga we täze ykdysady ösüş çeşmelerini döretjek innowasion gurşawy bilelikde ösdürmäge çagyrdy.
Maslahatda halkara söwdasynyň häzirki ýagdaýyna hem aýratyn üns berildi.
Hytaýyň söwda ministri Wan Wentao dünýä ykdysadyýetiniň ösüşiniň haýallaýandygyny, önümçilik we üpjünçilik zynjyrlarynyň böleklere bölünmek töwekgelçiliginiň bolsa artýandygyny aýtdy.
Şunuň bilen baglylykda, ol APEC-iň ykdysadyýetlerini erkin söwdany goldamaga, innowasiýalara esaslanýan ösüşi ilerletmäge we sanly hem-de intellektual ykdysadyýet boýunça düzgünleri sazlaşdyrmaga çagyrdy.
Hytaý daşary ýurt maýa goýumly kärhanalar üçin deň şertleri üpjün etmek, ykdysady açyklygy giňeltmek we emeli aň ýaly täze tehnologiýalar boýunça halkara hyzmatdaşlygyny ösdürmek ugruna ygrarlydygyny hem tassyklady.
Şeýle hem açyk çeşmeli tehnologiýalary ösdürmek we bilelikde ulanmak mümkinçiliklerine üns berildi.
APEC-iň ykdysadyýetleriniň wekilleri 2026-njy ýylyň dowamynda gazanylan hyzmatdaşlyk netijelerine oňyn baha berdiler we öňde boljak ýolbaşçylar sammitiniň üstünlikli geçirilmegine ýardam bermäge taýýardyklaryny mälim etdiler.
SSTV+-niň habar bermegine görä, Hytaý Şençžende geçiriljek noýabr sammitine taýýarlygyň jemleýji tapgyryna girişýär. 2026-njy ýylyň dowamynda APEC-iň çäklerinde 300-den gowrak duşuşyk we çäre geçirildi. Öňde boljak sammitiň esasy ugurlary erkin söwda, innowasiýalar we sebit ykdysady integrasiýasy bolar.
