Hytaý 2030-njy ýyla çenli 10 müň km ýokary tizlikli demir ýol, 21 müň km awtomagistral we 15 howa menzilini gurmagy meýilleşdirýär
Ulag infrastrukturasynyň ösüşi diňe adamlaryň we ýükleriň hereket tizligini däl, eýsem tutuş sebitleriň ykdysady mümkinçiliklerini hem kesgitleýär. Täze demir ýollar, awtomagistrallar, portlar we howa menzilleri şäherleriň arasyndaky aralygy ýakynlaşdyryp, söwda gatnaşyklaryny giňeltmäge hem-de logistika ulgamynyň netijeliligini ýokarlandyrmaga ýardam berýär.
4-nji noýabrda Hytaýyň Ösüş we özgertmeler boýunça döwlet komiteti 2026–2030-njy ýyllarda ýurduň ulag infrastrukturasyny döwrebaplaşdyrmak boýunça giň gerimli meýilnamalaryny mälim etdi.
Pekinde geçirilen metbugat maslahatynda edaranyň Infrastruktura ösüşi departamentiniň ýolbaşçysy Sýa Sin geljekki bäş ýylda Hytaýda takmynan 15 müň kilometr täze demir ýol gurmagyň meýilleşdirilýändigini habar berdi.
Şolaryň 10 müň kilometre golaýy ýokary tizlikli demir ýollar bolar.
Esasy wezipeleriň biri ýurduň demirgazygyndan günortasyna we gündogaryndan günbataryna uzalýan sekiz esasy ugurdan ybarat «sekiz dik we sekiz kese geçelge» milli demir ýol ulgamynyň gurluşygyny esasan tamamlamakdyr.
Ýokary tizlikli demir ýol tehnologiýalaryny ösdürmäge hem aýratyn üns berler.
Hytaý sagatda 400 kilometr tizlik bilen hereket etmäge niýetlenen demir ýol ugurlaryny gurmak we ulanmak üçin tehnologiýalary hem-de standartlary işläp taýýarlamagy çaltlaşdyrmagy meýilleşdirýär.
Şeýle hem bu ugurlaryň täjirçilik taýdan ulanylyşyny tapgyrlaýyn giňeltmek göz öňünde tutulýar.
Ileri tutulýan taslamalaryň arasynda iri derýalaryň boýundaky ýokary tizlikli demir ýollaryň gurluşygyny tamamlamak, kenarýaka ugurlary ösdürmek we serhetýaka sebitlerde demir ýol infrastrukturasyny giňeltmek bar.
Mundan başga-da, Sinszýandan kömür daşamagyň demir ýol mümkinçilikleri artdyrylar we Sinhuangdao — Şenýan ýokary tizlikli demir ýolunyň taslamasy boýunça taýýarlyk işleri ilerlediler.
Awtomobil ýollary ulgamynda hem uly möçberli gurluşyk işleri meýilleşdirilýär.
2030-njy ýyla çenli Hytaýyň ýokary tizlikli awtomagistrallar ulgamyna takmynan 21 müň kilometr täze ýol goşular.
Esasy üns milli ýol ulgamynyň ýetmeýän böleklerini birleşdirmäge, derýa boýundaky awtomagistrallary we iri şäherleriň daşyndan geçýän aýlaw ýollaryny gurmaga gönükdiriler.
Suw ulaglary ulgamynda takmynan 2500 kilometr ýokary derejeli gämi gatnaw ýollaryny gurmak göz öňünde tutulýar.
Şeýle hem 10 müň tonna we ondan ýokary ýük göterijilikli gämilere hyzmat edip bilýän 100-den gowrak awtomatlaşdyrylan port duralgasy dörediler.
Hytaý Şanhaýy dünýä derejesindäki halkara gämi gatnaw merkezine öwürmek işini çaltlaşdyrmagy, Ýanszy derýasynyň deltasyndaky we Guangdong — Gonkong — Makao Uly aýlag sebitindäki port toplumlaryny döwrebaplaşdyrmagy meýilleşdirýär.
Şeýle hem günorta-gündogar kenarýaka sebitlerinde, Beýbu aýlagynda portlar ösdüriler we Üç jülge sebitinde täze gämi gatnaw kanallary gurlar.
Raýat awiasiýasy ulgamynda hem iri taslamalar durmuşa geçiriler.
Bäş ýylyň dowamynda Hytaýda takmynan 15 täze raýat awiasiýasy howa menzilini gurmak meýilleşdirilýär.
Huh-Hoto, Sýamen we Dalýan şäherlerindäki täze howa menzilleriniň gurluşygy tamamlanar, Guangjou we Nantun şäherlerinde täze howa menzilleri gurlar.
Sanýa şäherindäki täze howa menziliniň taslamasy boýunça deslapky işler hem dowam etdiriler.
Mundan başga-da, hereket edýän iri howa menzilleri giňeldiler we serhetýaka sebitleriň awiasiýa infrastrukturasyny ösdürmek boýunça taslamalar amala aşyrylar.
Maksat Pekin, Şanhaý, Guangjou, Şençžen, Çendu we Çunsin ýaly iri şäherleriň töwereginde dünýä derejesindäki halkara awiasiýa merkezlerini döretmekdir.
SSTV+-niň habar bermegine görä, Hytaý 2026–2030-njy ýyllar üçin ulag infrastrukturasyny ösdürmek meýilnamasynyň çäklerinde takmynan 10 müň kilometr ýokary tizlikli demir ýol, 21 müň kilometr awtomagistral, 2500 kilometr gämi gatnaw ýoly we 15 töweregi täze howa menzilini gurmagy maksat edinýär.
