Hytaýyň deňiz ykdysadyýetiniň möçberi 2030-njy ýyla çenli 13 trillion ýuandan geçer
Dünýä ummanlary diňe halkara söwdanyň möhüm ýollary bolman, eýsem täze tehnologiýalaryň, energiýanyň we ykdysady ösüşiň möhüm çeşmesine öwrülýär. Deňiz ykdysadyýetiniň ösüşi ylmy innowasiýalar, ekologiýa taýdan durnukly senagat we sanly çözgütler bilen barha berk baglanyşýar.
Hytaý 2030-njy ýyla çenli deňiz ykdysadyýetiniň umumy önüminiň möçberini 13 trillion ýuandan, ýagny takmynan 1,95 trillion ABŞ dollaryndan ýokary derejä ýetirmegi meýilleşdirýär. Bu barada 3-nji noýabrda Hytaýyň Ösüş we özgertmeler boýunça döwlet komissiýasy habar berdi.
Bu maksat ýurduň 2026–2030-njy ýyllary öz içine alýan 15-nji bäşýyllyk meýilnamasynyň çäklerinde durmuşa geçiriler. Esasy ugurlar tehnologik innowasiýalary, täze pudaklary ösdürmegi we deňiz ykdysadyýetiniň çäk taýdan ýerleşişini kämilleşdirmegi öz içine alýar.
Hytaý deňiz barlaglary we senagaty üçin döwrebap enjamlary döretmäge, ýokary takyklykdaky gurallar, möhüm materiallar hem-de çuň suw şertlerinde meteorologiýa we nawigasiýa ulgamlary bilen bagly tehnologik kynçylyklary çözmäge aýratyn üns berer.
Bu strategiýany durmuşa geçirmekde milli barlaghanalar, ylmy-barlag merkezleri we ýokary okuw mekdepleri möhüm orun eýelär. Deňiz ylmy, inženerçilik we sanly tehnologiýalar boýunça köpugurly hünärmenleri taýýarlamak işleri güýçlendiriler.
Şol bir wagtda Hytaý kenarýaka portlaryny we esasy ulag geçelgelerini döwrebaplaşdyrmagy meýilleşdirýär. Ulagyň dürli görnüşlerini birleşdirýän multimodal ulgamlaryň ösdürilmegi ekologik taýdan has arassa nebithimiýa, öňdebaryjy enjamlary öndürmek we häzirki zaman port logistikasy boýunça senagat toplumlarynyň döremegine ýardam eder.
Hytaýyň Ösüş we özgertmeler boýunça döwlet komissiýasynyň Sebitleýin ösüşi utgaşdyrmak departamentiniň başlygynyň orunbasary Ma Weýçen deňiz biomedisinasyny, täze deňiz materiallaryny we deňiz elektron-maglumat tehnologiýalaryny ösdürmäge aýratyn ähmiýet beriljekdigini aýtdy.
Geljekki ugurlaryň arasynda çuň suw senagaty, umman energiýasyndan peýdalanmak we deňiz pudagynda emeli aň tehnologiýalaryny ornaşdyrmak hem bar.
Bu çözgütler ylmy açyşlary täze önümlere, hyzmatlara we ykdysady ösüşiň goşmaça çeşmelerine öwürmäge mümkinçilik berer.
Häzirki wagtda ösdürilýän tehnologiýalaryň arasynda deňiz tolkunlarynyň energiýasyny elektrik energiýasyna öwürýän ulgamlar, deňizde ýüzýän ýel elektrik desgalary we elektrik öndürmegi balykçylyk hojalygy bilen utgaşdyrýan toplumlaýyn platformalar bar.
Şeýle innowasiýalar deňiz serişdelerinden has netijeli peýdalanmagyň we energetikany, senagaty hem-de ekologiýa meselelerini özara utgaşdyrmagyň mümkinçiliklerini görkezýär.
Şeýlelikde, Hytaý deňiz ykdysadyýetini ylmy barlaglary, döwrebap senagaty, gaýtadan dikeldilýän energiýany we halkara logistikany birleşdirýän strategik ugur hökmünde ösdürmegi maksat edinýär.
SSTV+-niň habar bermegine görä, Hytaý 2030-njy ýyla çenli deňiz ykdysadyýetiniň umumy önümini 13 trillion ýuandan ýokary derejä ýetirmegi meýilleşdirip, tehnologik innowasiýalara, täze pudaklaryň ösüşine we port infrastrukturasynyň döwrebaplaşdyrylmagyna aýratyn üns berýär.
