Hytaýyň belent daglyk sebitlerinde gaýtadan dikeldilýän energiýanyň paýy 50 göterimden geçdi
Soňky bäş ýylyň dowamynda Hytaýyň belent daglyk sebitlerinde gaýtadan dikeldilýän energiýa çeşmeleriniň oturdylan kuwwatynyň paýy 28,5 göterimden 52,9 göterime çenli ýokarlandy. Hytaýyň Elektrik energiýasy geňeşiniň maglumatyna görä, bu görkeziji ýurt boýunça ortaça derejeden 4,4 göterim punkt ýokarydyr.
2026-njy ýylyň sentýabr aýynyň ahyryna çenli Hytaýyň belent daglyk sebitlerinde täze energiýa çeşmelerinden elektrik öndürýän desgalaryň umumy oturdylan kuwwaty 528 million kilowata ýetdi. Bu ýurt boýunça umumy kuwwatyň 25,6 göterimine deňdir.
Ýel energiýasynyň kuwwaty 197 million kilowata ýetip, Hytaýyň umumy ýel energiýasy kuwwatynyň 28,1 göterimini düzdi. Gün energiýasynyň oturdylan kuwwaty 327 million kilowata, ýagny ýurt boýunça umumy görkezijiniň 24,9 göterimine deň boldy. Gün ýylylyk elektrik energiýasynyň kuwwaty bolsa 2,12 million kilowata ýetdi.
Hytaýyň Elektrik energiýasy geňeşiniň Statistikalar we sanly seljeriş departamentiniň müdiriň orunbasary Sýan Debin belent daglyk welaýatlarda we sebitlerde täze energiýa çeşmeleriniň ösüşiniň çaltlaşýandygyny belledi. Onuň aýtmagyna görä, soňky bäş ýylda deňiz derejesinden ortaça beýikligi 1 500 metr ýa-da ondan ýokary bolan ýedi welaýatda we sebitde täze energiýa çeşmeleriniň oturdylan kuwwaty 144 million kilowatdan 476 million kilowata çenli artdy. Ýyllyk ortaça ösüş depgini 34,8 göterime deň boldy.
CCTV+ habar bermegine görä, ýel we gün energiýasynyň ösdürilmegi Hytaýyň belent daglyk sebitlerinde arassa energiýa kuwwatyny artdyrmagyň esasy ugurlarynyň birine öwrülýär.
