HKP Merkezi komitetiniň bäşinji plenumy partiýanyň içindäki doly we berk dolandyryş barada rezolýusiýa kabul etdi
Syýasy institutlaryň yzygiderli ösdürilmegi diňe uzak möhletli maksatlary kesgitlemek bilen çäklenmän, eýsem tertip-düzgüni, jogapkärçiligi we dolandyryşyň netijeliligini yzygiderli berkitmegi hem talap edýär. Pekinde duşenbeden penşenbe gününe çenli geçirilen Hytaýyň Kommunistik partiýasynyň XX çagyrylyşynyň Merkezi komitetiniň bäşinji plenumynda partiýanyň içindäki doly we berk dolandyryşy mundan beýläk-de kämilleşdirmek barada rezolýusiýa kabul edildi.
Mejlise HKP Merkezi komitetiniň Syýasy býurosy başlyklyk etdi. Merkezi komitetiň Baş sekretary Si Szinpin möhüm çykyş etdi we Syýasy býuronyň işi barada hasabat hödürledi. Plenumyň gatnaşyjylary hasabaty diňlediler we ara alyp maslahatlaşdylar, rezolýusiýanyň taslamasyna garadylar hem-de partiýanyň içindäki dolandyryşy berkitmegiň esasy meselelerine bagyşlanan resminamany kabul etdiler. Si Szinpin taslama boýunça düşündiriş berdi.
Jemleýji beýanatda HKP Merkezi komitetiniň dördünji plenumyndan bäri Syýasy býuronyň alyp baran işlerine oňyn baha berlendigi bellenilýär. Partiýanyň bir asyrdan gowrak taryhyna ser salnyp, onuň belent maksatlaryna, milli galkynyşa we hytaý halkynyň abadançylygyny ýokarlandyrmaga gönükdirilen işlerine aýratyn ähmiýet berildi.
Merkezi komitet täze döwürde partiýanyň içindäki doly we berk dolandyryş syýasatynyň çäginde gazanylan netijelere hem ýokary baha berdi. Resminamada Si Szinpiniň ýolbaşçylygyndaky HKP Merkezi komitetiniň uzak möhletleýin dolandyryşy netijeli amala aşyryp biljek marksistik partiýany gurmak baradaky täze garaýyşlary we çemeleşmeleri öňe sürendigi bellenilýär. Bu garaýyşlar Si Szinpiniň partiýa gurluşygy baradaky pikirlerinde öz beýanyny tapdy.
Beýanatda partiýanyň içindäki dolandyryşy mundan beýläk-de kämilleşdirmek üçin amatly şertleriň bardygyna garamazdan, täze ýagdaýlaryň we meseleleriň hem ýüze çykýandygy nygtalýar. Dünýädäki, ýurduň içindäki we partiýanyň özündäki düýpli özgerişler Hytaýyň özygtyýarlylygyny, howpsuzlygyny we ösüş bähbitlerini goramak, özgertmeleri ilerletmek, jemgyýetçilik durnuklylygyny saklamak hem-de partiýanyň öňdebaryjy häsiýetini berkitmek boýunça işleri has-da çylşyrymlaşdyrýar.
Geljekki işleriň esasy ýörelgeleriniň hatarynda partiýanyň maksatlaryna hyzmat etmek, syýasy ýolbaşçylygy berkitmek, ähli derejelerde berk talaplary berjaý etmek, anyk meseleleriň çözgüdine gönükmek, esasy ýörelgelere ygrarlylygy täzelikler bilen utgaşdyrmak, ýokardan aşaklygyna yzygiderli ýolbaşçylyk etmek we partiýany düzgünnamalara laýyklykda dolandyrmak görkezildi.
Plenumda amaly çäreleriň birnäçe ugry hem kesgitlenildi. Olaryň arasynda partiýa ruhuny berkitmek, demokratik merkezleşme ýörelgesini berjaý etmek, işgärleriň işine berk gözegçilik etmek, ähli derejelerde partiýa guramalaryny ösdürmek, iş usullaryny kämilleşdirmek we tertip-düzgüni güýçlendirmek bar. Korrupsiýa garşy göreşe aýratyn üns berildi. Resminamada korrupsiýanyň diňe ýüze çykýan görnüşlerini däl, eýsem onuň düýp sebäplerini hem aradan aýyrmak, berk jeza çärelerini, maksatly düzedişleri we öňüni alyş işlerini utgaşdyrmak zerurdygy bellenilýär.
Partiýanyň düzgünlerini we institutlaryny berkitmek, şeýle hem partiýada we döwletde gözegçilik ulgamlaryny kämilleşdirmek uzak möhletli wezipeler hökmünde görkezildi. Jemleýji beýanatda partiýanyň içindäki doly we berk dolandyryş syýasatyny yzygiderli durmuşa geçirmek üçin ähli partiýa agzalarynyň jogapkärçilik çekýändigi nygtalýar. Plenumyň kararlaryny öwrenmek we durmuşa geçirmek häzirki döwürde hem-de ýakyn geljekde partiýanyň esasy syýasy wezipeleriniň biri diýlip kesgitlenildi.
Plenumda HKP-niň XXI milli gurultaýyny 2027-nji ýylyň ikinji ýarymynda Pekinde geçirmek barada hem karar kabul edildi. Resminamada gurultaýyň sosialistik döwrebaplaşdyrmagy esasan amala aşyrmak maksadynyň durmuşa geçirilýän möhüm döwründe geçiriljekdigi we partiýa hem-de ýurt üçin uly syýasy ähmiýete eýe boljakdygy bellenilýär.
Mundan başga-da, Çžan Şenmin HKP Merkezi komitetiniň Syýasy býurosynyň täze agzasy hökmünde saýlandy. Plenumyň gatnaşyjylary Merkezi komitetdäki boş orunlary dalaşgär agzalaryň hasabyna doldurmak barada hem karar kabul etdiler. Şeýle hem Merkezi tertip-düzgün barlag komissiýasynyň we Merkezi harby komissiýanyň düzgün-nyzam hem-de kanun bozulmalary baradaky hasabatlaryna garaldy we Syýasy býuronyň düzgün bozujylary jezalandyrmak baradaky ozalky kararlary tassyklanyldy.
HKP Merkezi komiteti tutuş partiýany Si Szinpiniň ýolbaşçylygyndaky Merkezi komitetiň daşyna has-da jebisleşmäge we täze döwürde hytaý aýratynlyklaryna eýe bolan sosializm baradaky Si Szinpiniň pikirlerini doly durmuşa geçirmäge çagyrdy. Plenumyň işine Merkezi komitetiň 162 agzasy we 117 dalaşgär agzasy gatnaşdy. Merkezi tertip-düzgün barlag komissiýasynyň agzalary, degişli edaralaryň ýolbaşçylary, käbir başlangyç derejedäki partiýa işgärleri, şeýle hem bilermenler we alymlar ses bermek hukugy bolmazdan mejlise gatnaşdylar.
CCTV+ habar bermegine görä, HKP Merkezi komitetiniň bäşinji plenumynyň netijeleri partiýanyň içindäki dolandyryşy, tertip-düzgüni we korrupsiýa garşy göreşi mundan beýläk-de berkitmegiň esasy ugurlaryny kesgitledi. Şeýle hem 2027-nji ýylyň ikinji ýarymynda geçirilmegi meýilleşdirilýän XXI gurultaýa taýýarlyk tassyklanyldy.
