9 aýda 43 milliard tonna ýük we 51 milliard ýolagçy sapary: Hytaýyň ulag pudagy ösýär
2026-njy ýylyň ilkinji dokuz aýynda Hytaýyň ulag pudagy durnukly ösüşi görkezdi. Hytaýyň Ulag ministrliginiň duşenbe güni çap eden maglumatlaryna görä, ýük daşamagyň, portlaryň ýük dolanyşygynyň we sebitara ýolagçy gatnawlarynyň möçberi geçen ýylyň degişli döwri bilen deňeşdirilende artdy.
Ýanwar–sentýabr aýlarynda täjirçilik ýük daşamalarynyň möçberi 43,04 milliard tonna ýetdi. Bu geçen ýylyň degişli döwründäkiden 2,3% köpdür. Diňe sentýabr aýynda görkeziji ýyllyk hasapda 1,3% ýokarlandy.
Şu ýyl awtoulag eksportyna, ASEAN ýurtlary bilen söwda gatnaşyklaryna we Ýewropa ýük daşamalaryna hyzmat edýän birnäçe täze deňiz ugry açyldy. Bu portlaryň işjeňliginiň we ýük dolanyşygynyň artmagyna ýardam berdi.
Ilkinji üç çärýekde Hytaý portlarynda ýük dolanyşygy 13,64 milliard tonna ýetip, geçen ýylyň degişli döwri bilen deňeşdirilende 0,7% artdy. Daşary söwda ýükleriniň dolanyşygy 2,9% ýokarlandy. Konteýner dolanyşygy bolsa 4,5% artyp, 280 million TEU-a — ýigrimi futluk standart konteýnerleriň ekwiwalentine ýetdi.
Ýylyň dowamynda baýramçylyk günleri syýahatlara bolan islegi ýokarlandyrdy. Syýahatçylaryň dürli isleglerini kanagatlandyrmak üçin ýurduň birnäçe sebitinde ýörite syýahatçylyk demir ýol ugurlary işe girizildi. Halkara raýat awiasiýasy ugurlaryndaky ýolagçy gatnawy hem geçen ýylyň degişli döwri bilen deňeşdirilende 4,7% artdy.
Maglumatlara görä, ýanwar–sentýabr aýlarynda Hytaýda 51,22 milliard sebitara ýolagçy sapary hasaba alyndy. Bu ýyllyk hasapda 1,2% ösüşdir. Sentýabr aýynda bolsa şeýle gatnawlaryň sany 5,1% ýokarlandy.
Ulag ministrliginiň Ulaglary meýilleşdiriş we ylmy-barlag institutynyň baş inženeri Çen Szin: «Ilkinji üç çärýekde ulag ykdysadyýeti durnukly ösmegini dowam etdirdi. Esasy görkezijiler ösüşi saklady, pudagyň özgertmeleri we döwrebaplaşdyrylmagy yzygiderli ilerledi. Bu Hytaý ykdysadyýetiniň durnuklylygyny we kuwwatyny görkezýär» diýip belledi.
CCTV+ habar bermegine görä, 2026-njy ýylyň ilkinji üç çärýegindäki görkezijiler Hytaýda ýük we ýolagçy gatnawlarynyň artýandygyny hem-de ulag pudagynyň döwrebaplaşdyrylmagynyň dowam edýändigini görkezýär.
