40 sekuntda üýtgeýän jaý: Hytaýyň ýygnama öýleri daşary ýurtly alyjylaryň ünsüni çekýär
Hytaýyň günortasyndaky Guangdong welaýatynyň merkezi Guançžou şäherinde geçirilýän Kanton ýarmarkasynda görkezilýän ýygnama jaýlar daşary ýurtly alyjylaryň ünsüni çekdi. Alyjylar jaýlaryň ýokary hilini we önümler bilen bilelikde hödürlenýän giňişleýin hyzmatlary aýratyn bellediler.
Hytaýyň 140-njy Import we eksport ýarmarkasynyň güýzki tapgyry 15-nji oktýabrdan 4-nji noýabra çenli dowam edýär. Anna güni başlanan bäş günlük ikinji tapgyr öýde rahat ýaşamak üçin niýetlenen önümlere bagyşlanýar. Serginiň meýdany 515 müň inedördül metrden gowrak bolup, onda 25 müňden köp sergi nokady ýerleşýär. Ýarmarka 10 müňden gowrak kärhana gatnaşýar.
Daşary ýurtlarda döwrebap ýaşaýyş çözgütlerine bolan islegiň artýandygyny nazara alyp, hytaýly öndürijiler taýýar önümleri we degişli hyzmatlary öz içine alýan toplumlaýyn çözgütleri hödürleýärler.
Serginiň üns çekiji önümleriniň biri görnüşini üýtgedip bilýän ýygnama jaý boldy. Elektrik teleskopik mehanizmiň kömegi bilen ol bary-ýogy 40 sekundyň içinde ýapyk binadan içki howlusy bolan jaýa öwrülip bilýär.
Sergä gatnaşýan Çžan Ýunyň aýtmagyna görä, kompaniýa eýýäm 600–800 töweregi potensial müşderiden ýüzlenme alypdyr. Käbir alyjylar önümi gören badyna sargyt beripdirler.
Kanadaly alyjy Kristofer bu görnüşli jaýlaryň Kanada bazarynyň isleglerine laýyk gelýändigini aýtdy. Onuň bellemegine görä, ýurtda ýaşaýyş jaýlarynyň ýetmezçiligi gurluşygyň uzak dowam etmegi we çykdajylaryň ýokary bolmagy bilen has-da çylşyrymlaşýar. Ol hytaý önümçiliginiň hiline we önüm bilen bilelikde hödürlenýän toplumlaýyn hyzmatlara ýokary baha berdi.
«Önüm we hyzmat» modeli öý üçin niýetlenen beýleki harytlara-da ýaýraýar. Ýarmarkada hödürlenen maglumatlara görä, gatnaşyjylaryň takmynan 36,5 göterimi bu çemeleşmäni ulanýar.
Braziliýaly alyjy Sezar Sawino ýarmarkanyň gurluşyk tehnikasyny öndürijiler bilen göni gepleşik geçirmäge, enjamlary ýerinde görmäge we dürli teklipleri deňeşdirmäge mümkinçilik berýändigini aýtdy. Bu bolsa Braziliýada köp sanly infrastruktura taslamalarynyň amala aşyrylýandygy sebäpli aýratyn ähmiýete eýe bolup, wagty tygşytlamaga ýardam berýär.
CCTV+ habar bermegine görä, Kanton ýarmarkasy hytaýly öndürijilere daşary ýurtly hyzmatdaşlary tapmaga, döwrebap ýygnama jaýlary we öý üçin toplumlaýyn çözgütleri halkara bazaryna çykarmaga mümkinçilik berýär.
