Hytaýyň Halk banky maliýe bazaryny goldamak boýunça täze çäreleri yglan etdi
Hytaýyň Halk banky beýleki maliýe düzgünleşdiriji edaralar bilen bilelikde maliýe bazarynyň durnuklylygyny ýokarlandyrmak we onuň açyklygyny giňeltmek üçin täze çäreleri girizer. Bu barada duşenbe güni merkezi bankyň ýolbaşçysy Pan Gungşen aýtdy.
Täze çäreleriň biri bank däl maliýe guramalaryndan serişdeleriň köpçülikleýin çykarylmagy ýagdaýynda likwidligi üpjün edýän ýörite mehanizmi döretmek bolar. Şeýle hem hemişelik karz bermek mehanizmini ulanyp biljek maliýe edaralarynyň sanyny giňeltmek meýilleşdirilýär.
Düzgünleşdirijiler bankara obligasiýa bazary bilen birža obligasiýa bazarynyň arasyndaky gatnaşyklary hem güýçlendirmegi maksat edinýärler. Bu dürli maliýe bazarlarynyň arasynda serişdeleriň hereketini ýeňilleşdirmäge gönükdirilendir.
Mundan başga-da, daşary ýurt maliýe edaralarynyň Hytaýyň içerki walýuta bazarynda ýuany satyn almak we satmak amallaryny ýeňilleşdirmek üçin synag çäreleri giriziler.
Aýratyn çäreler Pekin we Pekin — Týanszin — Hebeý sebiti, Şanhaý we Ýanszy derýasynyň deltasy, şeýle hem Guangdong — Gonkong — Makao Uly aýlag sebitindäki halkara ylmy-tehnologik innowasiýa merkezleriniň maliýe taýdan goldanylmagyna gönükdiriler.
Pan Gungşen bu başlangyçlary 19–22-nji oktýabr aralygynda Pekinde geçirilýän Financial Street Forum 2026-nyň ýyllyk konferensiýasynyň açylyş dabarasynda mälim etdi.
Şu ýyl forum “Global maliýe ösüşi üçin açyk, hyzmatdaşlyga esaslanýan we hemmeleri öz içine alýan ekoulgamy döretmek” mowzugy astynda geçirilýär. Oňa 40-dan gowrak ýurtdan we sebitden 400-den gowrak wekiliň gatnaşmagyna garaşylýar.
CCTV+ habar bermegine görä, yglan edilen çäreler Hytaýyň maliýe ulgamynyň durnuklylygyny güýçlendirmäge, daşary ýurt maliýe edaralarynyň bazara gatnaşygyny giňeltmäge we ylmy-tehnologik ösüşi goldamaga gönükdirilendir.
