Hytaý dokuz aýda 8,2 million awtoulag eksport etdi, ýylyň ahyryna çenli 10 milliondan geçmegine garaşylýar
Hytaýyň awtoulag öndürijileri indi diňe aýratyn modelleri daşary ýurtlara çykarmak bilen çäklenmän, ylmy-barlag we ösüş, önümçilik, üpjünçilik zynjyrlary hem-de satuwdan soňky hyzmatlary öz içine alýan has giň global ulgama geçýärler.
Pekindäki XPeng salonlarynyň birinde täze model köp sanly müşderiniň ünsüni çekdi. Içerki bazarda satuwa çykarylandan bary-ýogy bir aýdan gowrak wagt geçenden soň, onuň halkara görnüşi 2026-njy ýylyň Pariž awtoulag sergisinde görkezildi. Daşary ýurtlara ilkinji üpjünçilikler hem şu ýyl meýilleşdirilýär.
XPeng kompaniýasynyň wekili U Dipeýiň sözlerine görä, awtoulag başyndan 60-dan gowrak ýurt we sebit üçin kadalaşdyryjy talaplary we ýerli aýratynlyklary göz öňünde tutup işlenip taýýarlanypdyr. Bu içerki we daşary ýurt bazarlarynda modelleriň satuwa çykarylmagynyň arasyndaky wagty ep-esli gysgaltmaga mümkinçilik berýär.
Şeýle-de bolsa, global işläp taýýarlamak ähli bazarlarda birmeňzeş ulag satmak diýmek däldir. Öndürijiler ýol şertlerine we sürüjilik endiklerine laýyklykda sazlamalary üýtgedýärler. Mysal üçin, Li Auto Hytaý we Ýewropa üçin awtoulaglaryň hereket aýratynlyklaryny aýratyn sazlaýar we Ýewropanyň dar şäher köçelerini hem göz öňünde tutýar.
Hytaý kompaniýalary daşary ýurtlarda ylmy-barlag merkezlerini döredýärler we önümçiligi ýerelleşdirýärler. Guangzhou Automobile Group awtoulaglaryň işlenip taýýarlanylmagyndan başlap önümçilige, üpjünçilik zynjyryna we hyzmatlara çenli ähli ugurlary öz içine alýan ulgamlaýyn halkara ösüş modeline geçýändigini mälim etdi.
Hytaýyň Awtoulag öndürijiler birleşiginiň maglumatlaryna görä, şu ýylyň ilkinji dokuz aýynda Hytaý 8,205 million awtoulag eksport etdi. Bu geçen ýylyň degişli döwri bilen deňeşdirilende 65,8 göterim köpdür. Ýylyň jemleri boýunça eksportyň 10 million awtoulagdan geçmegine garaşylýar.
Täze energiýa çeşmelerinde işleýän ulaglar umumy eksportyň 48,8 göterimini düzdi. Olaryň eksporty geçen ýyl bilen deňeşdirilende takmynan 2,3 esse artdy, adaty ýangyçly awtoulaglaryň eksportyndaky ösüş bolsa 31,6 göterim boldy.
CCTV+ habar bermegine görä, Hytaýyň awtoulag eksportynyň ösüşi barha köp derejede tehnologiýalara, ýerli bazarlara uýgunlaşmaga, global ylmy-barlag işlerine we täze energiýa ulaglarynyň ösmegine daýanýar.
