140-njy Kanton ýarmarkasyna takmynan 340 müň daşary ýurtly alyjy gatnaşýar
Penşenbe güni Guançžou şäherinde 140-njy Hytaý import we eksport ýarmarkasy, ýagny Kanton ýarmarkasy açyldy. Oňa 32 müňden gowrak kompaniýa we takmynan 340 müň daşary ýurtly alyjy gatnaşýar.
Bu ýyl ýarmarka 70 ýyllygyny belleýär. Serginiň umumy meýdany 1,55 million inedördül metre barabar bolup, ol üç tapgyrda geçirilýär we 4-nji noýabra çenli dowam eder.
Gatnaşyjylaryň 11 müňden gowragy öz ugurlarynda öňdebaryjy ýa-da ýokary tehnologiýaly täze önümleri öndürýän kompaniýalardyr. Eksponentleriň takmynan 64 göterimi senagat interneti, emeli aň we beýleki täze tehnologiýalary ulanýar.
Täze önümleriň paýy 23,2 göterime, ekologiýa taýdan arassa önümleriň paýy bolsa 26 göterime ýetdi. Iki görkeziji hem rekord derejä çykdy. Şeýle hem ýarmarkanyň dowamynda 700-den gowrak täze önümiň tanyşdyrylyşy geçiriler.
Birinji tapgyr penşenbeden duşenbe gününe çenli dowam edýär we öňdebaryjy önümçilige bagyşlanýar. 12 müňden gowrak kompaniýa 520 müň inedördül metr meýdanda elektronika, durmuş tehnikasy, senagat awtomatlaşdyrylyşy we beýleki önümleri görkezýär.
Aýratyn bölümlerde hyzmat robotlary, pilotsyz uçuş enjamlary we ekran tehnologiýalary ýaly täze ugurlar hem görkezilýär.
Daşary ýurtly alyjylaryň köp gelmegi Guançžou we Şençžen howa menzillerindäki ýolagçy akymyny artdyrdy. Köp alyjylar Hytaýyň elektrik ulaglaryna, robotlaryna, durmuş tehnikasyna we beýleki akylly önümlerine uly gyzyklanma bildirýärler.
CCTV+ habar bermegine görä, Kanton ýarmarkasy Hytaýyň iň uly we iň uzak wagt bäri geçirilýän halkara söwda sergisi bolup, ýurduň daşary söwdasynyň möhüm görkezijileriniň biri hasaplanýar.
