Hytaý bilen Botswana gatnaşyklaryny hemmetaraplaýyn strategik hyzmatdaşlyk derejesine çykardy
Hytaý Halk Respublikasynyň Başlygy Si Szinpin bilen Botswananyň Prezidenti Duma Gideon Boko sişenbe güni Pekinde iki ýurduň gatnaşyklarynyň hemmetaraplaýyn strategik hyzmatdaşlyk derejesine çykarylandygyny yglan etdiler.
Gepleşikleriň dowamynda Si Szinpin Hytaý bilen Botswananyň dostlugynyň “almaz ýaly ýagty we uzak ömürli” bolmalydygyny aýtdy. Ol taraplary özara goldawyň taryhyny ýatda saklap, täze döwürde gatnaşyklary has-da ösdürmäge çagyrdy.
Hytaý Botswana bilen sanly ykdysadyýet, oba hojalygy, maldarçylyk we bilim ulgamlarynda hyzmatdaşlygy giňeltmäge taýýardygyny mälim etdi. Şeýle hem Afrikanyň Hytaý bilen diplomatik gatnaşyklary bolan ýurtlary üçin girizilen nol gümrük paçlaryndan netijeli peýdalanmak teklip edildi.
Duşuşykda magdançylyk pudagyndaky hyzmatdaşlyga hem aýratyn üns berildi. Hytaý tarapy hyzmatdaşlygy özara bähbitlilik, ekologiýa taýdan arassa tehnologiýalar, önümçiligiň goşulan gymmatyny ýokarlandyrmak we Afrikanyň döwrebaplaşmagyna ýardam bermek ýörelgeleri esasynda ösdürmegi teklip etdi.
Botswananyň Prezidenti Duma Boko ýurdunyň Hytaýdan has köp maýa goýumlaryny çekmäge gyzyklanma bildirýändigini hem-de senagat, oba hojalygy, magdançylyk, innowasiýalar we sanly özgertmeler boýunça hyzmatdaşlygy giňeltmäge taýýardygyny aýtdy.
Gepleşiklerden soň iki döwletiň Baştutanlary “Bir guşak, bir ýol” başlangyjy, ekologiýa taýdan arassa magdançylyk, saglygy goraýyş we işgärleri taýýarlamak ýaly ugurlarda hyzmatdaşlyk resminamalarynyň gol çekişlik dabarasyna gatnaşdylar.
CCTV+ habar bermegine görä, täze hyzmatdaşlyk derejesi Hytaý bilen Botswananyň arasynda syýasy dialogy, söwdany, maýa goýumlaryny we tehnologiýa hyzmatdaşlygyny has-da giňeltmäge gönükdirilendir.
