Hytaý ýaş alymlary we tehnologiýa startaplaryny goldamak üçin LIFT+ maksatnamasyny işe girizdi
Ýaşlaryň ylmy-tehnologik innowasiýalaryna bagyşlanan “Geljekki tehnologiýalaryň liderleri+” (LIFT+) atly uly göwrümli dokumental taslama 3-nji oktýabrda China Media Group-yň platformalarynda resmi taýdan ýaýlyma çykdy.
Programma her şenbe güni sagat 17:30-da CCTV-4 teleýaýlymynda görkeziler we şol bir wagtda Yangshipin media platformasynda hem ýaýlyma berler.
Taslama China Media Group, Hytaýyň Bilim ministrligi we Nankin şäher häkimligi tarapyndan bilelikde döredildi. Ol ýaş tehnologiýa toparlaryny goldamak üçin senagat, ýokary okuw mekdepleri, ylmy-barlag edaralary we maýa goýum pudagynyň serişdelerini birleşdirýär.
LIFT+ taslamasynyň çäklerinde Hytaýyň 10 şäherinde 15 sany deslapky saýlaw geçirildi. Hasaba alnan takmynan 500 kärhananyň we innowasion toparyň arasyndan ortaça ýaşy 28 bolan 100 ýaş innowator topary saýlanyp, taslamalaryny ösdürmek üçin Nankine ýygnandy.
Ilkinji bölüm deslapky saýlawdan üstünlikli geçen 22 ýaş toparyň ösüş ýoluny görkezýär. Olary goldamak üçin alymlardan, pudak hünärmenlerinden we iri maýa goýum kompaniýalarynyň ýolbaşçylaryndan ybarat “ýaş innowasiýa ilçileri” topary döredildi.
Taslama eýýäm uly möçberde maýa goýumlaryny çekdi. Oňa gatnaşýan 34 ylmy-tehnologik kärhana jemi 485 million ýuandan gowrak, ýagny takmynan 72,5 million ABŞ dollary möçberinde maliýe serişdelerini aldy.
CCTV+ habar bermegine görä, taslamanyň Nankin şäheri bilen hyzmatdaşlygynyň netijesinde şäherde 31 täze kärhana hem döredildi.
