Hytaýda güýzki däne hasylynyň 60 göteriminden gowragy ýygnaldy
Hytaýyň Oba hojalygy we oba işleri ministrliginiň soňky maglumatlaryna görä, ýurtda güýzki däne hasylynyň 60 göteriminden gowragy eýýäm ýygnaldy.
Gündogar Hytaýyň Szýansu welaýatynyň Çžençžan şäherinde 73 müň gektardan gowrak ýerde tüwi bişip ýetişýär. Daýhanlar amatly howadan peýdalanyp, mehanizirlenen usulda hasyl ýygýarlar. Bu usulda ormak, dänäni bölüp almak, samany ownatmak we meýdany arassalamak işleri bir wagtda ýerine ýetirilýär.
Anhueý welaýatynda meteorologlar 15-nji oktýabrdan başlap ýagyş garaşylýandygyny habar berdiler. Şonuň üçin däne öndürilýän sebitlerde häzirki açyk howadan netijeli peýdalanmak üçin hasyl ýygnamak işleri tizleşdirilýär. 11-nji oktýabra çenli bu welaýatda 3,11 million gektardan gowrak güýzki ekin ýygnaldy we işleriň ýerine ýetirilişi 70 göterimden geçdi.
Týanszin şäherinde Sýaosžan tüwisiniň ir bişýän görnüşleri hasyla girip başlady. Bu ýyl hasyllylygyň geçen ýyl bilen deňeşdirilende takmynan 7 göterim artmagyna we bir gektardan ortaça 8 250 kilogramdan gowrak önüm alynmagyna garaşylýar.
Hasyl ýygnamagyň iň ýokary döwri oktýabr aýynyň ortalarynda garaşylýar.
Heýlunszýan welaýatynda 11-nji oktýabra çenli takmynan 8,15 million gektar ekin meýdanynyň hasyly ýygnaldy. Güýzki hasyl ýygnamak işleri ýarym çäkden geçdi, soýanyň ýygnalyşy bolsa 80 göterimden gowrak ýerine ýetirildi.
CCTV+ habar bermegine görä, Hytaýda güýzki hasyl ýygnamak işleri çalt depginde dowam edýär we daýhanlar amatly howa şertlerinden mümkin boldugyça netijeli peýdalanýarlar.
