Adidas, Siemens we Intuitive Surgical Şanhaýda hyzmatlar pudagynyň we emeli aňyň ösüşini ara alyp maslahatlaşdy
Iri halkara kompaniýalaryň ýolbaşçylary we Şanhaý şäheriniň ýokary derejeli wekilleri şäher häkiminiň ýanyndaky Halkara işewürlik ýolbaşçylarynyň maslahat geňeşiniň 38-nji mejlisine gatnaşdylar. Bu ýyl esasy üns hyzmatlar pudagynyň we emeli aňyň ösüşine gönükdirildi.
Ýyllyk duşuşyga 14 ýurtdan 42 telekeçi gatnaşdy. 1989-njy ýylda döredilen bu geňeş Şanhaýyň uzak möhletli ösüşini we daşary ýurt maýa goýumlaryny çekmek meselelerini ara alyp maslahatlaşmak üçin möhüm meýdança öwrüldi.
Adidas kompaniýasynyň baş direktory Býorn Gulden şäher ykdysadyýetiniň ösüşini we ýaş sarp edijileriň işjeňligini belledi. Onuň sözlerine görä, kompaniýa ýerli bazara niýetlenen önümleri köpeldýär we Şanhaýdaky ösüşine ýokary baha berýär.
Duşuşykda hyzmatlar pudagyna aýratyn üns berildi. 2025-nji ýylda bu pudak takmynan 672 milliard ABŞ dollary möçberinde goşulan gymmat döretdi. Ol Şanhaýyň jemi içerki önüminiň takmynan 80 göterimini, ykdysady ösüşiň we býujet girdejileriniň 80 göterimden gowragyny, şeýle hem iş bilen üpjünçiligiň tas 80 göterimini emele getirýär.
Siemens AG kompaniýasynyň başlygy Roland Buş hyzmatlar pudagynyň mümkinçilikleriniň diňe maliýe we syýahatçylyk bilen çäklenmeýändigini, önümçilikde hem uly mümkinçilikleriň bardygyny aýtdy.
Intuitive Surgical kompaniýasynyň direktorlar geňeşiniň ýerine ýetiriji başlygy Geri Gutart döwlet we şäher syýasatlarynyň ösen lukmançylyk tehnologiýalaryny, şol sanda hirurgiki robot tehnikasyny we emeli aňy goldamakda sazlaşykly alnyp barylýandygyny belledi.
CCTV+ habar bermegine görä, hyzmatlar pudagyny giňeltmek we täze tehnologiýalary ösdürmek Hytaýyň ykdysady strategiýasynyň möhüm ugurlarynyň biri bolup galýar, Şanhaý bolsa halkara maýasy, hünärmenler we tehnologiýa kompaniýalary üçin esasy merkez hökmünde ornuny berkitmegi dowam etdirýär.
