Hytaýda 6 müňden gowrak talyp uçýan enjamlary taslamak boýunça bäsleşýär
Hytaýyň günorta-günbataryndaky Syçuan welaýatynyň Szýgun şäherinde 2026-njy ýylyň Hytaý uniwersitetleriniň uçýan enjamlary taslamak boýunça bäsleşigi geçirilýär. Oňa 200-den gowrak ýokary okuw mekdebinden 6 müňden gowrak talyp we mugallym gatnaşýar.
Bäşinji gezek geçirilýän bäsleşik anna güni açyldy we 12 ugur boýunça dowam edýär. Talyp toparlary kiçi göwrümli uçýan enjamlary özleri taslaýarlar we ýasaýarlar, soňra bolsa olary dürli amaly wezipeleri ýerine ýetirmekde synagdan geçirýärler.
Logistika dronlary boýunça ýaryşda uçýan enjam ýük göterip, ony bellenen nyşana takyk taşlamaly. Pekin awiasiýa we kosmonawtika uniwersitetiniň topary bu ýyl adaty tegelek paraşýutlaryň ýerine dolandyrylýan planýor görnüşli paraşýutlary ulanyp, täze çözgüdi diýen ýaly başdan işläp taýýarlady.
Başga bir ugurda uçýan enjamlaryň gysga aralykda uçup galmak we gonmak mümkinçilikleri synagdan geçirilýär. Gonkong uniwersitetiniň topary şowsuz synagdan soň dessine sebäpleri seljermäge başlady. Talyplaryň bellemegine görä, her bir şowsuzlyk täze tejribe almaga we enjamy kämilleşdirmäge mümkinçilik berýär.
Guramaçylaryň aýtmagyna görä, bäsleşigiň tabşyryklary hakyky durmuşdaky zerurlyklara esaslanýar. Ýük daşamak we bellenen ýere takyk taşlamak ýaly mümkinçilikler halas ediş işlerinde, tebigy betbagtçylyklaryň netijelerini aradan aýyrmakda hem-de pes belentlikdäki ykdysadyýeti ösdürmekde ulanylyp bilner.
Hytaýyň Aeronawtika we astronawtika jemgyýetiniň wekilleri bäsleşigiň talyplara nazary bilimlerini amaly başarnyga öwürmäge kömek edýändigini bellediler. Internetiň we emeli aňyň ösmegi awiasiýa baradaky maglumatlary ýaşlar üçin has elýeterli eden hem bolsa, hakyky uçýan enjamy döretmek henizem giň tejribe we amaly taýýarlyk talap edýär.
CCTV+ habar bermegine görä, şeýle bäsleşikleriň ýokary okuw mekdeplerinde giňden geçirilmegi Hytaýyň awiasiýa pudagy üçin ýaş hünärmenleriň täze neslini taýýarlamaga ýardam edýär.
