Pekiniň 12345 telefon belgisi ýedi ýylyň dowamynda 200 million ýüz tutmany kabul etdi
Pekiniň 12345 gullugy ýedi ýylyň dowamynda raýatlaryň we kärhanalaryň takmynan 200 million ýüz tutmasyny işläp, Hytaýyň paýtagtynda sanly şäher dolandyryşynyň esasy gurallarynyň birine öwrüldi.
Bu ulgam 2019-njy ýylda işe girizildi we häzirki wagtda her gün 70 müňden gowrak ýüz tutmalary kabul edýär. Ýüz tutmalaryň çözülmegi hem-de ulanyjylaryň kanagatlanma derejesi boýunça görkezijiler 97 göterimden geçýär.
Pekin uniwersitetiniň professory Lýu Gan, takmynan 24–25 million ilaty bolan iri şäher üçin ulgamyň diňe bir ýüz tutmalary kabul etmek bilen çäklenmän, eýsem, olaryň mundan beýläk seredilişine hem gözegçilik edip bilmeginiň aýratyn möhümdigini belledi.
Onuň sözlerine görä, şikaýatlar bilen işlemegiň elektron poçta, aýry-aýry gulluklara ýüz tutmak we telefon arkaly maslahatlaşmak ýaly adaty usullary kiçi şäherlerde netijeli bolup biler. Emma Pekin ýaly iri şäher üçin has giň gerimli sanly infrastruktura zerurdyr.
Bilermen, şeýle hem, toplanan maglumatlaryň ylmy barlaglar üçin ähmiýetini nygtady. Sanly hyzmatlar şäheriň gündelik işjeňligini, ulag ulgamyny we şäher ösüşini seljermäge, şeýle hem zyňyndylary azaltmagyň we serişdelerden peýdalanmagyň netijeliligini ýokarlandyrmagyň ýollaryny gözlemäge mümkinçilik berýär.
Şol bir wagtyň özünde, sanly infrastrukturanyň ösdürilmegi täze ylmy-barlag meselelerini hem döredýär. Olar häzirki zaman şäher hyzmatlarynyň işlemegi üçin zerur bolan maglumat merkezleri, internet torlary we beýleki tehnologik ulgamlar bilen baglanyşyklydyr.
"CCTV+"-niň habar bermegine görä, Pekiniň tejribesi sanly platformalaryň beýleki şäherlerde hem ulanylyp bilinjekdigini görkezýär. Emma olaryň netijeliligi dolandyryşyň guralyşyna, serişdeleriň paýlanyşyna we ýerli häkimiýetleriň şeýle çözgütleri ornaşdyrmaga taýýarlygyna baglydyr.
