Dünýäde öndürilýän her ýedi gitaranyň biri Hytaýyň Çženýan etrabynda öndürilýär
Öň sebitdäki iň garyp etraplaryň hatarynda bolan Guýçžou welaýatynyň Çženýan etraby häzirki wagtda gitara öndürmegiň iri dünýä merkezleriniň birine öwrüldi. Häzirki wagtda dünýäde öndürilýän gitaralaryň takmynan her ýedinjisi şu ýerde öndürilýär.
Bu pudagyň ösüşi ýerli ýaşaýjylaryň, ozal iş gözläp Hytaýyň kenarýaka sebitlerine giden adamlaryň saz gurallary önümçiliginde işlemek tejribesini toplap, dogduk mekanlaryna dolanyp başlamagy bilen baglanyşyklydyr. 2013-nji ýylda Çžen doganlar öz önümçilik liniýasyny Çženýan etrabyna göçürip, ilkinji iri gitara zawodlarynyň birini açdylar.
Wagtyň geçmegi bilen kärhanalaryň töwereginde simlerden, gulakçalardan we ses kabul edijilerden başlap, futlýarlara we gaplamalara çenli önümçiligiň tutuş bir zynjyry emele geldi. Häzirki wagtda etrapda 140-dan gowrak öndüriji we üpjün ediji işleýär.
Çženýanyň kärhanalary her ýyl 2,5 milliondan gowrak saz guralyny öndürýär, önümlerini 40-dan gowrak ýurda we sebite eksport edýär hem-de 15 müňe golaý iş ornuny üpjün edýär.
Ýerli kompaniýalar import edilýän agaçlara bolan garaşlylygy azaltmaga hem çalyşýarlar. Olar alternatiwa hökmünde bambuk we uglerod kompozitlerini synagdan geçirýärler. Bu materiallar saz gurallaryny çyglylyga has çydamly we daşamak üçin has amatly etmäge mümkinçilik berýär.
Öndürijiler şol bir wagtyň özünde öz brendlerini, patentlerini we özboluşly modellerini ösdürýärler. Şeýlelikde, olar şertnama esasynda önüm öndürmekden kem-kemden has ýokary tehnologiýaly we özbaşdak önümleri öndürmäge geçýärler.
CCTV+ habar bermegine görä, Çženýanyň ösüş taryhy hünärli işgärleriň yzyna dolanmagy, önümçilik zynjyrynyň ösdürilmegi we tehnologik innowasiýalaryň daglyk etraba saz gurallarynyň dünýä bazaryna çykmagyna nähili ýardam berendigini görkezýär.
