Hytaýly teleoperator Ma Goçin öz durmuşyny we hünärini Milli gün bilen baglanyşdyrýar
Hytaýly teleoperator Ma Goçiniň ýurduň Milli güni bilen aýratyn baglanyşygy bar. Ol 1986-njy ýylyň 1-nji oktýabrynda dünýä inýär. Oňa «Gosin» («Milli gün» diýen manyny berýär) adyny goşunda gulluk eden atasy dakýar.
Birnäçe onýyllygyň dowamynda Hytaý Halk Respublikasynyň döredilmeginiň hormatyna käbir hytaý maşgalalary çagalaryna Goçin adyny dakypdyrlar.
Bu baglanyşyk Ma Goçin üçin 2019-njy ýylda, ol Týananmen meýdançasynda HHR-iň döredilmeginiň 70 ýyllygyna bagyşlanan dabaraly harby ýörişiň göni ýaýlymyny düşürende aýratyn ähmiýete eýe boldy.
Teleoperatoryň aýtmagyna görä, ol heniz mekdep ýyllarynda ýurduň 50 ýyllygyna bagyşlanan dabaralara gatnaşmak isläpdir, emma eline şikes ýetmegi sebäpli muny başaryp bilmändir. Birnäçe ýyldan soň bolsa 2019-njy ýyldaky dabaraly harby ýörişiň ilkinji panoramalaýyn görnüşleriniň birini hut oňa düşürmek nesip edipdir.
Ma Goçin öz hünär ýolunyň dowamynda diňe Milli gün mynasybetli geçirilýän çärelerde däl, eýsem iri halkara sport ýaryşlarynda hem işläpdir. Onuň bellemegine görä, wideo düşüriş tehnologiýalarynyň üýtgemegi has giň gerimdäki tehnologik ösüşleri hem görkezýär: "Beta" we DVCAM kameralaryndan häzirki zaman köpugurly sanly ulgamlara çenli uly özgeriş bolup geçdi.
"CCTV+"-niň habar bermegine görä, Ma Goçiniň wakasy Milli güni diňe bir döwlet baýramçylygy hökmünde däl, eýsem häzirki zaman Hytaýynyň möhüm wakalaryny ýazga geçirmek bilen baglanyşykly adamlaryň şahsy durmuşynyň bir bölegi hökmünde hem görkezýär.
