Hytaýda Milli gün mynasybetli baýramçylyk döwründe ýolagçy akymy ýokary bolmagynda galýar
Milli gün mynasybetli ýedi günlük dynç alyş döwrüniň dördünji gününde Hytaýyň ulag ulgamy ýolagçylaryň ýokary akymy bilen işini dowam etdirýär. Esasan hem gysga we orta aralykly demir ýol gatnawlarynyň, şeýle hem welaýatlaryň arasyndaky awtoulag syýahatlarynyň sany ep-esli artdy.
Ýekşenbe güni ýurduň demir ýollary boýunça takmynan 20,35 million ýolagçynyň daşalmagyna garaşylýar. Bu görkeziji 2025-nji ýylyň degişli güni bilen deňeşdirilende 11 göterim köpdür. Ýolagçylaryň artan islegini kanagatlandyrmak üçin goşmaça 935 otly gatnawa goýberildi.
Demir ýol menzillerinde ýolagçylara bilet satyn almak, ugur görkezmek we gatnaw hyzmatlaryny hödürleýän syýahatçylyk hyzmat merkezleri işleýär. Demir ýol operatorlary hem otlularyň ýolagçy sygymyny artdyrýar, goşmaça gatnawlary we gijeki ýokary tizlikli otlulary belleýär.
Awtomobil ýollarynda welaýatlaryň arasyndaky ýolagçy akymy we elektrik ulaglarynyň sany artýar. Sýansu, Syçuan, Guandun, Hunan we Çžeszýan welaýatlarynyň awtomagistrallarynyň käbir böleklerinde ulag dyknyşyklarynyň ýüze çykmak töwekgelçiligi ýokary bolmagynda galýar.
Ýekşenbe güni suw ulaglary arkaly ýolagçy gatnawlarynyň sanynyň 1,95 milliondan geçmegine garaşylýar. Adalara gatnaýan ugurlara, şäher içindäki gezelenç gatnawlaryna we gämili syýahatlara bolan isleg ýokary bolmagynda galýar.
"CCTV+"-niň habar berşi ýaly, ulag hyzmatlary baýramçylyk döwründäki ýolagçy akymynyň möçberini dolandyrmak we gatnawlaryň howpsuzlygyny üpjün etmek üçin goşmaça otlulardan, gämileri "akylly" gözegçilikde saklamak ulgamlaryndan hem-de ulag hereketini düzgünleşdirmegiň ýörite çärelerinden peýdalanýar.
