Hytaý ABŞ-nyň çäreleri bilen bagly söwda päsgelçilikleri boýunça derňewleriň möhletini uzaltdy
Hytaý Halk Respublikasynyň Söwda ministrligi ABŞ-nyň dünýä önümçilik we üpjünçilik zynjyrlaryna zeper ýetirip biljek, şeýle hem ýaşyl önümleriň söwdasyna päsgel berip biljek çäreleri bilen bagly derňewleriň möhletiniň seredilýän işleriň çylşyrymlylygy sebäpli 27-nji dekabra çenli uzaldylandygyny habar berdi.
Derňewler 27-nji martda başladyldy. Ministrligiň maglumatlaryna görä, olar Hytaý kompaniýalarynyň täjirçilik bähbitlerine zyýan ýetirip biljek çäreleri öz içine alýar. Hytaý tarapynyň bahalandyrmagyna görä, käbir ýagdaýlarda bu çäreler Bütindünýä Söwda Guramasynyň düzgünlerine we beýleki halkara söwda-ykdysady ylalaşyklara ters gelip biler.
Seredilýän çäreleriň hataryna ýokary tehnologiýaly önümleriň Hytaýa eksport edilmegine girizilen çäklendirmeler, esasy pudaklara maýa goýumlary babatda çäklendirmeler, ýaşyl önümleriň ABŞ-a iberilmegine döredilýän päsgelçilikler, täze energetika ulgamyndaky taslamalaryň durmuşa geçirilmeginiň haýalladylmagy we tehnologik hyzmatdaşlyga girizilen çäklendirmeler girýär.
CCTV+ habar berşi ýaly, möhletiň uzaldylmagy Söwda ministrligine ABŞ-nyň çäreleriniň hytaý kärhanalaryna, dünýä üpjünçilik zynjyrlaryna we ekologiýa ugurly önümleriň söwdasyna edýän täsirine baha bermegi dowam etdirmäge mümkinçilik berer. Derňewleriň netijelerine dekabryň ahyryna çenli garaşylýar.
