Hytaý ÝB-de ara alnyp maslahatlaşylýan söwda çäresini proteksionizmiň we birtaraplaýyn çemeleşmäniň ýüze çykmasy hökmünde tankytlady
Hytaý Ýewropa Bileleşiginde ara alnyp maslahatlaşylýan söwda çäresini proteksionizmiň we birtaraplaýyn çemeleşmäniň ýüze çykmasy hökmünde tankytlady. Hytaý Halk Respublikasynyň Söwda ministrligi Ýewropa Bileleşigine agza birnäçe döwletiň Ýewropa Komissiýasyny «301» diýlip atlandyrylýan Ýewropa guralyny işläp taýýarlamak işini çaltlandyrmaga we Hytaýa has berk çemeleşmäge çagyrýan bilelikdäki resminamany taýýarlamaga girişendigi baradaky habarlara teswir berdi.
Ministrligiň wekili habarlarda agzalýan guralyň hytaý tarapynyň garaýşyna görä, bar bolan meseleleri çözmäge ýardam etmejekdigini we Ýewropa Bileleşiginiň özüne ýaramaz täsir ýetirip biljekdigini aýtdy. Pekinde şeýle çäräniň Hytaý bilen Ýewropa Bileleşiginiň arasyndaky söwda gatnaşyklaryna, şeýle hem dünýä önümçilik we üpjünçilik zynjyrlarynyň durnuklylygyna zyýan ýetirip biljekdigi hem hasaplanýar.
Söwda ministrligi Ýewropa Bileleşiginiň Bütindünýä Söwda Guramasynyň möhüm agzasy bolup durýandygyny we däp bolşy ýaly, köptaraplaýyn söwda ulgamyny goldap çykyş edýändigini ýatlatdy. Hytaý tarapynyň pikirine görä, BSG-niň düzgünlerine garşy gelýän çäreler umumy düzgünlere esaslanýan halkara söwda ulgamyna zyýan ýetirip biler.
Häzirki wagtda Hytaý bilen Ýewropa Bileleşigi söwda we maýa goýum meseleleri boýunça mehanizmiň çäginde geňeşmeleri dowam etdirýär. Taraplar özara ykdysady we söwda aladalaryny kadalaşdyrmagyň mümkin bolan ýollaryny ara alyp maslahatlaşýarlar.
Hytaýyň degişli edarasynyň wekili Pekiniň pikirine görä, bir wagtyň özünde geňeşmeleri geçirmek we Hytaýa edilýän basyşy güýçlendirmek özara ynamy pese düşürip, umumy gepleşikler işini çylşyrymlaşdyryp biljekdigini aýtdy.
Hytaý tarapy Ýewropa Bileleşigini düşünişmezlikleri dialogyň we geňeşmeleriň üsti bilen kadalaşdyrmagy dowam etdirmäge çagyrdy. Söwda ministrligi Ýewropa Bileleşiginiň mundan beýläkki hereketlerine gözegçilik etjekdigini we hytaý kompaniýalaryna ýa-da önümlerine garşy kemsidiji ýa-da çäklendiriji çäreler girizilen halatynda jogap çärelerini görjekdigini mälim etdi.
CCTV+ habar berşi ýaly, hytaý tarapynyň bu beýany Hytaý bilen Ýewropa Bileleşiginiň arasynda dowam edýän söwda-ykdysady geňeşmeleriň şertlerinde ýaňlandy. Ýagdaýyň mundan beýläk nähili ösjekdigi Ýewropa Bileleşiginiň haýsy anyk çäreleri ara alyp maslahatlaşmagy karar etjekdigine we taraplaryň hereket edýän dialog mehanizmleriniň çäginde bar bolan düşünişmezlikleri kadalaşdyryp biljekdigine bagly bolar.
