Dünýäniň tehnologiýa ägirtleri Hytaýda geçirilen sanly söwda sergisinde iň täze işläp taýýarlamalaryny hödürlediler
Dünýäniň iri halkara tehnologiýa kompaniýalary innowasiýalary görkezmek, hyzmatdaşlary gözlemek we işewürligini giňeltmek üçin Hytaýyň sanly ekoulgamyndan platforma hökmünde barha işjeň peýdalanýarlar. Hytaýyň Hançžou şäherinde geçirilýän 5-nji Bütindünýä sanly söwda sergisinde (GDTE) daşary ýurt kompaniýalary awtonom ulag, emeli aň we sanly saglygy goraýyş ulgamlaryndaky iň täze işläp taýýarlamalaryny hödürlediler.
Bäş gün dowam edýän sergi 23–27-nji sentýabr aralygynda Hytaýyň gündogaryndaky Çžeszýan welaýatynyň dolandyryş merkezi bolan Hançžou şäherinde geçirilýär. Şu ýyl sergä öňki ähli sergilerdäki daşary ýurt wekiliýetleriniň umumy sanyndan hem köp daşary ýurt wekiliýeti gatnaşdy. Serginiň umumy meýdany 170 müň inedördül metre barabar bolup, onuň 20 göterimden gowragyny halkara gatnaşyjylaryň ekspozisiýalary eýeleýär.
Iň köp gyzyklanma döreden eksponatlaryň biri Tesla kompaniýasynyň “Cybercab” sürüjisiz elektrik awtoulagy boldy.
“Cybercab” rul, pedallar we adaty gapdal aýnalar bilen enjamlaşdyrylmandyr. Bu model ýörite awtonom sürüş üçin işlenip taýýarlanyldy we ýokary çözgütli kartalaryň ýerine bortdaky sekiz kameradan peýdalanýar. Awtoulag nawigasiýa üçin wizual seljerişi we bitewi neýron toruny ulanýar.
Akylly lukmançylyk enjamlary zolagynda ýerleşýän ABŞ-nyň “Medtronic” kompaniýasynyň diwarlygy hem sergä gatnaşyjylaryň uly gyzyklanmasyny döretdi. Lukmançylyk tehnologiýalary we neýromodulýasiýa boýunça ýöriteleşen kompaniýa “Digital Trade Expo” sergisine ilkinji gezek emeli aň bilen «beýni-kompýuter» interfeýs tehnologiýasyny birleşdirýän enjam bilen gatnaşýar.
Kompaniýanyň wekilleriniň aýtmagyna görä, ulgam beýniniň yşaratlaryny okaýar we Parkinson keseli bolan näsaglar üçin ýöriteleşdirilen anyklaýyş we bejeriş meýilnamalaryny düzmäge ýardam berýär.
«Bu önüm dünýäde beýni üçin niýetlenen iň kiçi we iň ýeňil kardiostimulýatordyr. Onuň özboluşly sensor tehnologiýasy näsagyň beýnisindäki adaty bolmadyk elektrik tolkunlaryny ýüze çykaryp, soňra olary seljermäge we ulgamlaşdyrmaga mümkinçilik berýär» diýip, “Medtronic” kompaniýasynyň Hytaýdaky neýromodulýasiýa bölüminiň menejeri Saý Sinsýan aýtdy.
Guramaçylaryň aýtmagyna görä, şu ýylky serginiň esasy wakalarynyň biri öňdebaryjy halkara kompaniýalarynyň, şol sanda “Fortune Global 500” sanawyna girýän 55 kompaniýanyň işjeň gatnaşmagy boldy.
«Şu ýyl sergä 2000-den gowrak eksponent gatnaşdy, olaryň 400-den gowragy daşary ýurtly kompaniýalardyr. Sergi “Google”, “Amazon” we “Tesla” ýaly dünýäniň öňdebaryjy kompaniýalaryny, şeýle hem eýýäm bäş ýyl bäri sergä yzygiderli gatnaşyp gelýän kompaniýalary birleşdirdi» diýip, Bütindünýä sanly söwda sergisiniň guramaçylyk komitetiniň sekretariatynyň baş sekretary Li Ýan aýtdy.
Sergi halkara işewürlik mümkinçiliklerini giňeltmekde emeli aňy baglanyşdyryjy halka hökmünde ulanýar. “Amazon China” kompaniýasynyň wise-prezidenti Sýu Şeniň aýtmagyna görä, daşary ýurtlaryň iri tehnologiýa kompaniýalary Hytaýyň akylly innowasiýalar we önümçilik ekoulgamynyň çäginde hyzmatdaşlyk mümkinçiliklerini öwrenýärler.
«Hytaý dünýäde iň ösen önümçilik ulgamyna, iň depginli sanly innowasiýa ekoulgamyna we dünýä derejesinde giňelmäge ymtylýan telekeçileriň uly jemgyýetine eýedir. Şonuň üçin biz bu ýerde ägirt uly mümkinçilikleriň bardygyny görýäris. Serginiň üsti bilen kärhanalary serhetara elektron söwda ulgamynyň gatnaşyjylary bilen netijeli baglanyşdyryp, özara bähbitli netijeleri gazanyp bilýäris» diýip, ol aýtdy.
Häzirki wagta çenli çärä 163 ýurtdan we sebitden 50 müňden gowrak hünärmen-satyn alyjy hasaba alyndy. Olaryň 12 müňden gowragy halkara alyjylardyr. Öňünden ylalaşylan halkara satyn alyş şertnamalarynyň möçberi 1,085 milliard ABŞ dollaryna ýetdi.
“CCTV+”-niň habar gullugynyň habar bermegine görä, Hançžouda geçirilýän Bütindünýä sanly söwda sergisi innowasion önümlerini hödürlemäge, hyzmatdaşlary tapmaga we Hytaýyň sanly bazarynyň täze mümkinçiliklerinden peýdalanmaga çalyşýan halkara tehnologiýa kompaniýalary üçin möhüm meýdança öwrülýär.
