Hytaý sanly islegiň artmagyna taýýarlyk görüp, indiki nesil aragatnaşyk ulgamlaryny ösdürýär
Geljekki bäş ýylda Hytaý sanly ykdysadyýetiň barha artýan isleginden öňe geçmäge ukyply aragatnaşyk infrastrukturasynyň döredilmegini çaltlandyrmagy maksat edinýär. Bu diňe bir 5G torlarynyň giňeldilmegini däl, eýsem 10 gigabitli torlara geçmegi, hemra internetini ösdürmegi, hasaplaýyş kuwwatlyklaryny artdyrmagy we 6G tehnologiýalaryna taýýarlyk görmegi hem öz içine alýar.
Hytaý bazaryň isleginden öňe geçip, indiki nesil aragatnaşyk torlaryny ornaşdyrmaga çalşar diýip, Hytaýyň Senagat we maglumat tehnologiýalary ministriniň orunbasary Ýu Sýaohueý çarşenbe güni Pekinde geçirilen her ýylky Halkara poçta we telekommunikasiýa aragatnaşygy sergisinde (PT Expo) aýtdy.
Bu meýilnamalar ministrlik tarapyndan ýakynda çap edilen 15-nji bäşýyllyk döwür — 2026–2030-njy ýyllar üçin maglumat-aragatnaşyk pudagyny ösdürmek meýilnamasyna laýyk gelýär.
Resminama laýyklykda, 2030-njy ýyla çenli Hytaýda giň gerimli we öňdebaryjy häsiýetlere eýe bolan täze nesil aragatnaşyk ulgamy doly kemala getirilmelidir. 5G-niň ýaýraw derejesiniň 95 göterime ýetirilmegi, 320 million hojalygy gigabit giň zolakly internet bilen üpjün etmek, akylly hasaplaýyş kuwwatynyň bolsa 9800 EFLOPS-a ýetirilmegi meýilleşdirilýär.
«Biz amalyýetlere gönükdirilen we geljegi nazara alýan indiki nesil aragatnaşyk torlarynyň ösdürilmegini yzygiderli öňe süreris, giň zolakly torlaryň goşa 10 gigabitli tehnologiýa tarap ösmegini üpjün ederis we pes Ýere golaý orbitada hemra internet ulgamlarynyň gurluşygyny ilerlederis» diýip, Ýu Sýaohueý aýtdy.
Onuň sözlerine görä, Hytaý gury ýerdäki we deňizdäki desgalary birleşdirýän aragatnaşyk torlaryny hemmetaraplaýyn kämilleşdirmegi, hasaplaýyş kuwwatlyklaryny giňeltmegi, şeýle hem milli bitewi hasaplaýyş toruna mundan beýläk-de goldaw bermek maksady bilen hasaplaýyş torlarynyň integrasiýasyny we hasaplaýyş çeşmeleriniň özara baglanyşygyny pugtalandyrmagy maksat edinýär.
Infrastrukturanyň ösdürilmegi emeli aňy hem öz içine alýan sanly intellekt tehnologiýalarynyň çalt ösýän döwrüne gabat gelýär. Bu tehnologiýalar maglumat-aragatnaşyk pudagy üçin täze mümkinçilikleri döredýär.
Resmi maglumatlara görä, iýul aýynyň ahyryna çenli Hytaýda 5,15 milliondan gowrak 5G bazalaýyn stansiýa ornaşdyryldy. Ýurtda eýýäm 10 gigabitli optiki torlaryň ilkinji tapgyryny ornaşdyrmak işleri başlandy, akylly hasaplaýyş kuwwatynyň möçberi bolsa 2185 EFLOPS-a ýetdi.
Meýilnama, şeýle hem, ýerüsti we hemra torlarynyň has çuňňur integrasiýasyny, şol sanda smartfonlary hemralara göni birikdirmek boýunça täjirçilik goşundylaryny we zatlaryň internetini ösdürmegi göz öňünde tutýar. Hytaý 6G bazalaýyn stansiýalary boýunça ylmy-barlag we işläp taýýarlama işlerini işjeňleşdirmegi, şeýle hem maglumat-aragatnaşyk pudagynyň hasaplaýyş torlary we kwant aragatnaşygy ýaly esasy ugurlarynda standartlary işläp taýýarlamagy öňe sürmegi maksat edinýär.
“CCTV+”-niň habar bermegine görä, çäre Hytaýyň 15-nji bäşýyllyk döwri üçin aragatnaşyk infrastrukturasynyň ösüş ugruny — 5G we optiki torlaryň gerimini giňeltmekden başlap, hemra aragatnaşygyna, hasaplaýyş kuwwatlaryna we 6G tehnologiýalaryna çenli bolan ugurlary görkezýär.
