Oba hojalygyny ösdürmek arkaly Hytaý El-Ninýo hadysasyna taýýarlanýar
Howa hemişe adamzadyň öňünde duran esasy synaglaryň biri bolup geldi we şeýle bolmagynda-da galýar. Ýöne taryh bize bir zady öwredýär: ýeňiş güýçliniň däl-de, öňünden görmegi we uýgunlaşmagy başarýanyň tarapynda bolýar. Hytaý nesilleriň tejribesine we häzirki zaman tehnologiýalaryna daýanyp, azyk üpjünçiliginiň geljegini ygtybarly goramak üçin berk binýady döredýär.
Howa maglumatlarynyň çaklamalary ýakyn aýlarda güýçli El-Ninýo hadysalarynyň dünýäde däne önümçiligine ep-esli näbellilik getirip biljekdigini görkezýär. Şunuň bilen baglylykda, Hytaýyň esasy ykdysady meýilleşdiriş edarasy ýurduň oba hojalyk pudagynyň umuman gowy taýýarlyklydygyny, howanyň üýtgemegi bilen bagly kynçylyklara garşy çäre görmäge mümkinçiliginiň we ynamynyň bardygyny mälim etdi.
Dänäniň durnukly we rekord derejedäki hasyllaryny üpjün etmegiň binýady berk bolmagynda galýar diýip, Hytaýyň Milli ösüş we özgertmeler toparynyň metbugat sekretary Li Çao Pekinde geçirilen metbugat maslahatynda aýtdy.
Ýurt boýunça ýokary hilli oba hojalyk ýerleriniň 66 million gektardan gowragy döredildi, suwarylýan ýerleriň meýdany bolsa 72 million gektardan geçýär. Kämilleşdirilen oba hojalyk ekinleriniň görnüşleri bilen üpjünçiligiň derejesi 96 göterimden geçdi, ekinleri ekmegiň we hasyly ýygnamagyň toplumlaýyn mehanizasiýa derejesi bolsa 76 göterimden ýokary boldy. Hasyly gyssagly ýygnamak we guratmak mümkinçilikleri hem ep-esli ýokarlandy. Hytaýda däne önümçiligi yzly-yzyna iki ýyl bäri 700 million tonnadan ýokary bolup gelýär.
«Häzirki ýagdaýa ser salanymyzda, şu ýyl güýzki we gyşky ekinleriň ekilmegine taýýarlyk işleri doly depginde alnyp barylýar. Ýakyn wagtda däne ekinleriniň giň gerimli güýzki hasylynyň ýygnalmagy başlanar, onuň yzyndan bolsa güýzki we gyşky ekinleri ekmegiň möhüm tapgyry geler. Dürli hasabatlara görä, ýurduň sebitleriniň köpüsinde howa şertleri amatly bolup, güýzki däne hasylynyň adaty tertipde ýygnaljakdygyna garaşylýar. Bu bolsa indiki ekin möwsümine taýýarlyk görmek üçin zerur şertleri döreder. Bugdaý tohumlarynyň ätiýaçlygy ýeterlik, dökünler we beýleki oba hojalyk serişdeleri bilen üpjünçilik hem gowy ýagdaýda», — diýip, Li aýtdy.
Hytaý tebigy betbagtçylyklara gözegçiligi we irki duýduryş ulgamyny güýçlendirer, suw hojalygynyň binýadyny pugtalandyrar, şeýle hem ýokary hilli oba hojalyk ýerlerini ösdürmegi we iri hem-de orta göwrümli suwaryş ulgamlaryny döwrebaplaşdyrmagy dowam etdirer.
Şeýle hem ýurt tohumçylyk pudagyndaky tehnologiýalara goldawy güýçlendirer, bazara gözegçiligi berkider, döwlet däne ätiýaçlyklaryndan netijeli peýdalanar we degişli sebitlerde iň pes satyn alyş bahalaryny dessine herekete geçirer. Munuň özi döwlet syýasatynyň ilaty durmuş taýdan goramakdaky ornuny netijeli ýerine ýetirmegini üpjün etmäge gönükdirilendir.
El-Ninýo — Ýuwaş ummanynyň ekwatoryň merkezi we gündogar böleginde deňiz üstüniň temperaturasynyň ýokarlanmagy bilen häsiýetlendirilýän tebigy howa hadysasydyr. El-Ninýo adatça iki ýyldan ýedi ýyla çenli aralykda bir gezek ýüze çykýar we takmynan dokuz aýdan on iki aýa çenli dowam edýär. Onuň dünýä derejesindäki temperatura täsiri köplenç hadysa emele geleninden soňky ýylda has aýdyň duýulýar.
Bütindünýä Meteorologiýa Guramasy garaşylýan örän güýçli El-Ninýo hadysasynyň dünýäniň köp sebitlerinde ygalyň mukdarynyň, temperaturanyň we atmosfera aýlanyşygynyň düýpli üýtgemek ähtimallygyny ýokarlandyrýandygyny duýdurdy. Şeýle-de bolsa, onuň täsirleri ýerleşişe we pasyla baglylykda dürli bolup biler we Hindi hem-de Atlantik ummanlardaky şertleri goşmak bilen beýleki howa faktorlary tarapyndan kesgitlenip biler.
CCTV+ agentliginiň habar berşi ýaly, Hytaý oba hojalyk infrastrukturasyny, ylmy barlaglary we irki duýduryş ulgamyny ösdürmäge daýanyp, azyk howpsuzlygyny yzygiderli pugtalandyrýar. Bu bolsa ýurda El-Ninýo ýaly dünýä derejesindäki howa bilen baglanyşykly kynçylyklarynyň öňünde-de geljege ynamly garamaga mümkinçilik berýär.
