Gonkong Orta güýz baýramçylygy mynasybetli dünýäniň dürli künjeklerinden 3000 çyra ýakýar
Çyralaryň ýagtylygy hemişe umydyň we jebisligiň nyşany bolup gelýär. Dürli medeniýetleriň çyralary bir seýilgähde birleşende, serhetler aradan aýrylýar, baýramçylyk bolsa hemmeler üçin umumy şatlyga öwrülýär.
Gonkongyň Syýahatçylyk geňeşi tarapyndan guralan Orta güýz baýramçylygy mynasybetli Halkara Çyralar festiwaly 17–27-nji sentýabr aralygynda Wiktoriýa seýilgähini ýagtylandyrar. Dünýäniň dürli künjeklerinden getirilen 3000-den gowrak çyra şäheriň köp sanly ýaşaýjylaryny we myhmanlaryny özüne çeker. Şu ýylky festiwalyň temasy — «Gaýtadan birleşmek». Ol milli we innowasion elementleri, şeýle hem ýerli we halkara medeniýetleri birleşdirýär. Festiwalyň taryhynda ilkinji gezek Orta güýz baýramçylygynyň däp bolan dabaralaryna dünýä medeniýetiniň elementleri goşulyp, özboluşly baýramçylyk ýagdaýy döredilýär.
Sergide dürli däp-dessurlary görkezýän çyralar, şol sanda Nankiniň taryhy Sinhuaý çyralary, Gonkongyň elde ýasalan çyralary we daşary ýurtlaryň çyralary görkezilýär. Wiktoriýa seýilgähiniň esasy girelgesinde myhmanlary Gonkongyň belent we ajaýyp banýan agaçlaryndan ylham alnyp taýýarlanan sekiz metr beýiklikdäki kompozisiýa garşylaýar. Bu eser Sinhuaý çyralaryny ýasaýan we hünäri milli maddy däl medeni mirasyň sanawyna girizilen ussalar topary tarapyndan ýörite Gonkong üçin döredilen dört sany äpet eseriň biridir.
Sergide Aziýanyň we Ýewropanyň 20 ýurdundan we sebitinden 3000-den gowrak çyra görkezilýär. Bu bolsa myhmanlara çyra ýasamak sungatynyň üsti bilen dünýäniň dürli künjekleriniň halk däp-dessurlary we baýramçylyk medeniýeti bilen tanyşmaga mümkinçilik berýär.
«Orta güýz baýramçylygy döwründe Gonkongyň köçeleri we geçelgeleri baýramçylyk şatlygyna beslenýär. Şu günki çyralar festiwaly örän owadan, ol adaty hytaý medeniýetiniň we halkara çyra medeniýetiniň özüne çekijiligini görkezýär. Festiwal köp sanly ýaşaýjylary we syýahatçylary özüne çekdi. Şu ýyl Gonkongyň ykdysadyýeti durnukly ýagdaýda, adamlarda bolsa kanagatlanma we şatlyk duýgusy bar», — diýip, Hytaý Halk Syýasy Konsultatiw Geňeşiniň Milli komitetiniň Gonkongdan agzasy Maýkl Wu Kim-kong aýtdy.
«Şu ýylky çyralar festiwaly güýçli däp bolan öwüşgin bilen tapawutlanýar, çyralaryň özi bolsa hakyky baýramçylyk şatlygyny döredýär. Şol bir wagtyň özünde festiwalda beýleki ýurtlardan we sebitlerden getirilen çyralar hem görkezilýär. Bu bolsa Gonkongyň dünýäniň dürli künjeklerinden gelen myhmanlary birleşdirip, gaýtadan birleşmegiň şatlygyny paýlaşmaga mümkinçilik berýän halkara megapolisdigini görkezýär. Orta güýz baýramçylygynyň we Milli günüň öňüsyrasynda Gonkong şatlykly baýramçylyk ýagdaýyna beslenýär», — diýip, Gonkongyň işewürler jemgyýetiniň wekili Uilýam So Wing-on aýtdy.
Bu täsin tomaşany synlanlaryň arasynda materikden gelen myhmanlar hem bar. «Gonkongdaky çyralary görmek üçin ýörite materikden geldim. Şu gün bu ýerde bolýandygyma örän şat. Bu ýerde aýratyn gowy ýagdaý bar, çyralar hem hakykatdan-da ajaýyp», — diýip, materikden gelen Saý familiýaly myhman aýtdy.
CCTV+ agentliginiň habar berşi ýaly, Gonkongdaky halkara Çyralar festiwaly däp-dessurlary we döwrebaplygy, ýerli we dünýä medeniýetlerini birleşdiren täsirli çärä öwrüldi. Ýagtylyk baýramçylygy diňe bir göze ýakymly görnüşleri bilen şatlyk paýlaman, eýsem jebisligiň we gaýtadan birleşmegiň gymmatlyklary barada hem ýatladýar.
