Si Szinpin Hytaý Kommunistik Partiýasynyň Merkezi Komitetiniň Syýasy býurosynyň mejlisine ýolbaşçylyk etdi: plenum oktýabr aýynda geçiriler
Partiýanyň öz-özüni dolandyryşyny pugtalandyrmak we nobatdaky plenuma taýýarlyk görmek Hytaý Kommunistik Partiýasynyň Merkezi Komitetiniň Syýasy býurosynyň mejlisiniň esasy meseleleri boldy. Ara alnyp maslahatlaşylan meseleleriň merkezinde partiýany hemmetaraplaýyn we berk dolandyrmagyň mehanizmlerini mundan beýläk-de kämilleşdirmek, şeýle hem ýakyn döwürde partiýanyň gurluşygy boýunça wezipeler durdy.
Duşenbe güni Hytaý Kommunistik Partiýasynyň (HKP) Merkezi Komitetiniň Baş sekretary Si Szinpin HKP Merkezi Komitetiniň Syýasy býurosynyň mejlisine ýolbaşçylyk etdi. Onda partiýany hemmetaraplaýyn we berk dolandyrmagy pugtalandyrmak bilen bagly esasy meseleler ara alnyp maslahatlaşyldy, şeýle hem öňde boljak plenumyň geçiriljek seneleri kesgitlenildi.
Mejlise gatnaşyjylar HKP-niň Merkezi Komitetiniň 20-nji çagyryşynyň bäşinji plenumynyň 26–29-njy oktýabrda Pekinde geçirilmegi barada karar kabul etdiler.
Şeýle hem plenumyň garamagyna «HKP-niň Merkezi Komitetiniň partiýany hemmetaraplaýyn we berk dolandyrmagy pugtalandyrmak baradaky karary» atly resminamanyň taslamasyny hödürlemek barada karar kabul edildi.
Kararyň deslapky taslamasy partiýanyň agzalarynyň, şeýle hem partiýanyň agzasy bolmadyk adamlaryň arasynda pikirleri we teklipleri almak üçin ýaýradyldy hem-de sorag geçirilenleriň arasynda giň goldawa eýe boldy.
Mejlisde bellenilişi ýaly, bu resminamada täze döwürde partiýany hemmetaraplaýyn we berk dolandyrmagy ilerletmekde gazanylan üstünliklere we toplanan tejribä obýektiw baha berilýär, häzirki we geljek döwürlerde partiýanyň gurluşygynyň ýagdaýy we wezipeleri çuňňur seljerilýär, şeýle hem bu işi mundan beýläk-de ilerletmegiň strategik ugurlary kesgitlenilýär.
Mejlise gatnaşyjylar partiýany hemmetaraplaýyn we berk dolandyrmagy yzygiderli pugtalandyrmagyň, partiýanyň umumy ýolbaşçylygyny, şeýle hem HKP-niň Merkezi Komitetiniň merkezleşdirilen we bitewi ýolbaşçylygyny goldamagyň, berk we yzygiderli çemeleşmäni saklamagyň hem-de degişli mehanizmleri we ulgamlary kämilleşdirmegiň zerurdygyny nygtadylar.
Mejlisiň dowamynda HKP-ni ýaşaýyş ukybyny saklaýan, döwür bilen aýakdaş hereket edýän, halk tarapyndan giňden goldanylýan, dürli synaglara döz gelmäge ukyply we hytaý aýratynlyklaryna eýe bolan sosializmi gurmakda güýçli ýolbaşçy merkez hökmünde çykyş edýän marksistik häkimiýet başyndaky partiýa hökmünde saklamak üçin tagalla etmegiň zerurdygy bellenildi.
Duşuşyga gatnaşyjylar partiýany hemmetaraplaýyn we berk dolandyrmagy yzygiderli ilerletmegiň ähmiýetine we gaýragoýulmasyzlygyna doly düşünmäge, partiýanyň gurluşygynyň esasy meselelerini çözmek üçin has ýokary ölçegleri ulanmagyň we has anyk çäreleri görmegiň zerurdygyny nygtadylar.
CCTV+ agentliginiň habar berşi ýaly, HKP-niň Merkezi Komitetiniň 20-nji çagyryşynyň bäşinji plenumy 26–29-njy oktýabrda Pekinde geçiriler we partiýany hemmetaraplaýyn we berk dolandyrmagy mundan beýläk-de pugtalandyrmak meselelerine garalar.
