Hytaý awtoulaglary dünýäniň ähli ýerinde satmak üçin dünýäde iň gowy awtoulag barlag ulgamyny döredýär
Häzirki zaman awtoulag önümçiliginde ýeňiş gazanýan tarap has çalt öndürýän däl-de, dünýä standartlaryna laýyklygy has ir we has takyk tassyklaýan tarap bolýar. Synag geçirmek indi diňe önümçiligiň soňky tapgyry bolman, eýsem dünýä bazarlaryna çykmaga ýol açýan strategik gurala öwrülýär. Hytaý hut şu ugra aýratyn ähmiýet berýär.
Hytaýyň milli awtoulag öndürijileri daşary ýurtlardaky işini giňeltdigiçe, halkara standartlaryna laýyklygy üpjün etmek üçin berk synag mümkinçilikleri möhüm tehniki şertleriň birine öwrülýär. Hytaýyň Awtoulag tehnologiýalary we ylmy-barlag merkeziniň (CATARC) zyňyndylary barlamak boýunça barlaghanalary häzirki wagtda Ýewro-7 standartlaryna laýyklykda synaglary geçirmek üçin doly kuwwata eýe bolup, howa şertlerini simulirleýän kameralary we tormoz ulgamyndan çykýan gaty bölejikleriň zyňyndylaryny barlamak üçin barlaghanalary öz içine alýan halkara derejesindäki öňdebaryjy ýöriteleşdirilen toplumlary döretdi. Şeýle hem CATARC Ýewropada, ABŞ-da, Ýaponiýada we beýleki iri bazarlarda hereket edýän kadalaşdyryjy standartlary öz içine alýan daşary ýurtlardaky tehniki hyzmat platformasyny döretdi.
«Biz Ýewropa, Demirgazyk Amerika, Günorta Amerika, Ýaponiýa, Günorta Koreýa we Ýakyn Gündogar ýaly esasy bazarlarda awtoulag kadalaryny, sertifikatlaşdyryş ulgamlaryny we kadalaşdyryjy talaplary çuňňur öwrendik. Eksporta niýetlenen awtoulag modelleriniň daşary ýurtlaryň berk ekologik standartlaryna laýyk gelmegine kömek edýäris we abraýly synag tehnologiýalarynyň üsti bilen ýokary hilli hytaý awtoulag önümleriniň dünýä bazarynda öňe ilerlemegini goldaýarys» diýip, CATARC-yň Týanszin awtoulag synag merkeziniň baş direktory Li Haýbin aýtdy.
Hytaý zyňyndylara bildirilýän kadalaryň berjaý edilmeginden başga-da, «akylly kabinalary» awtoulag bilen sarp edijiniň arasynda gönüden-göni baglanyşyk döredýän dolandyryş merkezi hökmünde kabul edip, akylly awtoulag ulgamlaryny barlamak mümkinçiliklerini giňeldýär. Çunsinde ýerleşýän Hytaýyň Söwda awtoulaglarynyň synag tehnologiýalary ylmy-barlag institutynyň barlaghanalarynda emeli aňdan peýdalanyp, dürli şertlerde akylly kabinalary barlamak üçin robotlaşdyrylan toplum işleýär. Akylly agentleriň uly modelleriniň esasynda işleýän, sözleýişi umumylaşdyrmak, taktil täsirleşme we ýüz keşbini simulirlemek ýaly mümkinçiliklere eýe bolan robot birnäçe dilde we dürli emosional äheňlerde sesli buýruklary berip bilýär. Bu bolsa awtoulaglaryň akylly ulgamlaryny gije-gündiziň dowamynda giňişleýin barlamaga mümkinçilik berýär.
«Akylly awtoulaglara diňe uly modeller we hasaplaýyş kuwwaty ýeterlik däl. Şeýle hem synag we barlagyň, üpjünçiligi standartlaşdyrmagyň we howpsuzlygyň binýadyny pugtalandyrmalydyrys. Häzirki wagtda biz bu ugurlaryň ählisini birleşdirýäris, şonuň netijesinde awtoulaglarda emeli aňyň mümkinçilikleri barlanyp bilinýän, durmuşa geçirilip bilinýän we has howpsuz ýagdaýda amala aşyrylýan bolýar» diýip, Çunsin şäheriniň Ykdysadyýet we maglumat tehnologiýalary boýunça şäher komissiýasynyň direktory Wan Çžisze aýtdy.
Howpsuzlygy barlamak babatda Hytaý esasy synag enjamlaryny, hususan-da, heläkçilik synaglarynda ulanylýan manekenleri ýerli önümçilik arkaly üpjün etmegi çaltlandyrýar. Köp ýyllaryň dowamynda heläkçilik synaglary üçin niýetlenen manekenleriň dünýä bazarynda daşary ýurt kompaniýalary agdyklyk etdi, halkara derejesinde ulanylýan bar bolan manekenler bolsa Ýewropa we Amerikanyň beden gurluşynyň aýratynlyklary esasynda işlenip taýýarlanyldy. Ýakynda CATARC üç esasy tehnologiýada — bioniki taslama düzmekde, bölekleri guýmakda we ulgamlaýyn synag geçirmekde — möhüm öňegidişlik gazandy hem-de Hytaý bazarynyň antropometrik maglumatlaryna uýgunlaşdyrylan, intellektual eýeçilik hukuklary doly özbaşdak bolan heläkçilik synagy manekenini üstünlikli işläp taýýarlady.
«Heläkçilik synaglarynda ulanylýan manekenler ulag serişdeleriniň howpsuzlygyna baha bermek üçin özboluşly “ölçeg guralydyr”. Öňler öz awtoulaglarymyza baha bermek üçin başgalaryň ölçeg nusgalaryny ulanýardyk. Indi bolsa özümiziň işläp düzen manekenlerimiziň kömegi bilen diňe bir hytaýly sarp edijileri has takyk gorap bilmän, eýsem howpsuzlyga baha bermekde başlangyjy hem öz elimizde saklap bileris» diýip, CATARC-yň uly baş bilermeni Lýu Çžisin aýtdy.
CCTV+ agentliginiň habar berşi ýaly, Hytaý dünýäniň iň öňdebaryjy awtoulag synag we tassyklama ulgamlarynyň birini yzygiderli döredýär. Ýewro-7 kadalaryna laýyklykdan başlap, öz önümçiligi bolan heläkçilik synagy manekenlerine we akylly kabinalary barlamak üçin robotlaşdyrylan toplumlara çenli durmuşa geçirilýän bu ädimler diňe bir hytaý brendleriniň halkara bazarlaryna çykmagyna ýardam bermän, eýsem sarp edijileriň hytaý awtoulaglarynyň hiline we howpsuzlygyna bolan ynamyny hem pugtalandyrýar.
