Hytaýda ilkinji robotlaşdyrylan ýol polisiýa topary Hançžou şäherinde döwrebaplaşdyryldy we köçelere çykaryldy
Tehnologiýalar şäherleriň keşbini üýtgedýär, ýöne olaryň esasy wezipesi adamlara hyzmat etmekden ybarat. Robotlar gündelik gözegçilik işlerini öz üstüne alyp, tertibi üpjün etmäge ýardam berenlerinde, polisiýa işgärleriniň has möhüm wezipelere üns bermäge mümkinçilikleri artýar, köçeler bolsa hemmeler üçin has howpsuz we amatly bolýar.
Hytaýyň gündogaryndaky Çžeszýan welaýatynyň Hançžou şäherinde ýerleşdirilen Hytaýdaky ilkinji robotlaşdyrylan ýol polisiýasy topary şu ýylyň maý aýynyň başynda resmi taýdan işe girizilenden soň, giňişleýin funksional döwrebaplaşdyrmagy tamamlady. Indi şäher ýollarynda hereket edýän döwrebaplaşdyrylan robotlar ilat bilen özara gatnaşygy, awtonom gözegçiligi, şeýle hem adam bilen enjamyň bilelikde ýol hereketini dolandyrmagyny has-da kämilleşdirýär. Bu bolsa şäherdäki ýol hereketini dolandyrmagy has akylly we netijeli etmäge mümkinçilik berýär.
Irden Hançžou şäheriniň Szýannan şaýolunda robotlar birnäçe çatrykda meýilleşdirilen gözegçiligi amala aşyrdy. Akylly enjamlar gözegçilik nokatlarynda özbaşdak hereket edip, motorly bolmadyk ulag serişdeleriniň ýol belgileri bilen bellenen çäklerden daşarda durmagynyň öňüni aldy we pyýadalara ýoly howpsuz geçmelidigi barada ýatlatdy.
Ýol polisiýasynyň wekilleriniň aýtmagyna görä, öňki robotlar gözegçiligiň kesgitlenen ugurlary boýunça işleýärdi we çatryklarda diňe bir ugra gözegçilik edip bilýärdi. Bu bolsa ýol hereketini dolandyrmakda «görünmeýän zolaklaryň» döremegine getirýärdi. Panoramalaýyn ýol hereketine gözegçilik ulgamy bilen enjamlaşdyrylan täze robotlar bolsa wakanyň ýerindäki ýol ýagdaýyna görä öz ugruny hakyky wagt tertibinde çeýe üýtgedip, takyk gözegçiligi üpjün edip bilýär.
Hançžou şäheriniň Jemgyýetçilik howpsuzlygy býurosynyň ýol hereketini dolandyrmak bölüminiň maglumatlaryna görä, robotlar şu ýylyň 1-nji maýynda işe girizileli bäri ýol robotlarynyň topary ilata 11 müňden gowrak hyzmaty ýerine ýetirdi we sürüjiler hem-de pyýadalar tarapyndan ýol hereketiniň kadalarynyň 230 müňden gowrak bozulmagynyň öňüni aldy. Akylly gözegçilik ulgamy esasy çatryklarda iň köp ulag hereketiniň bolýan wagty polisiýa işgärleriniň iş ýüküni 30–50 göterim azaltdy.
“CCTV+”-niň habar berşi ýaly, Hançžou şäherindäki robotlaşdyrylan ýol polisiýasynyň döwrebaplaşdyrylmagy tehnologiýalaryň şäher dolandyryşyny nädip has netijeli we adamlaryň bähbitlerine gönükdirilen görnüşe getirip bilýändigini görkezýär. Şeýle hem bu ulgam işgärleriň iş ýüküni azaltmaga we ýollardaky howpsuzlygy ýokarlandyrmaga ýardam edýär.
