Hytaý 100 million tonnadan gowrak bugdaý satyn aldy we 350 million tonna möçberinde güýzki satyn alyşlara taýýarlanýar
Azyk howpsuzlygy islendik ýurduň durnuklylygynyň esasydyr. Dänäniň öz wagtynda satyn alynmagy daýhanlaryň bähbitlerini goraýar we ilatyň azyk üpjünçiligini kepillendirýär, oýlanyşykly syýasat bolsa bazardaky deňagramlylygy saklamaga ýardam berýär.
Azyk we strategik ätiýaçlyklar boýunça milli müdirligiň maglumatlaryna görä, tomusky bugdaýy satyn alyş möwsümi tamamlanýandygy sebäpli, Hytaý öňde boljak güýzki bugdaý satyn alyşlaryna doly taýýarlyk gördi. Häzirki wagtda ýurtda satyn alnan bugdaýyň umumy möçberi 100 million tonnadan geçdi. Bugdaý hasylyny öndürýän daýhanlaryň bähbitlerini goramak maksady bilen, hökümet bugdaý üçin iň pes satyn alyş bahasy maksatnamasyny dessin herekete girizdi. «Sinograin» kompaniýasy bugdaý öndürýän iki esasy — Henan we Anhoý welaýatlarynda — 164 sany satyn alyş nokadyny açyp, bu syýasat arkaly goldanylýan bahalardan, möçber çäklendirmesiz bugdaý satyn almagy teklip etdi.
Ýurtda güýzki galla hasylynyň az-azdan bişip ýetişmegi bilen güýzki däne satyn alyş möwsümi başlanýar. Bu möwsümiň sentýabryň ahyryndan geljek ýylyň aprel aýynyň ahyryna çenli dowam etmegine garaşylýar. Ýurtda ýylyň dowamynda satyn alynýan dänäniň umumy möçberiniň takmynan dörtden üç bölegi güýzki möwsüme düşýär. Şol sebäpli bu döwür ýylyň iň möhüm däne satyn alyş we saklaýyş möwsümidir. Şu ýyl subsidiýa maksatnamasyna däne guradyjy enjamlar we dänäni gaýtadan işlemek üçin akylly enjamlar hem girizildi. Bu bolsa güýzki hasylyň üznüksiz satyn alynmagyny, saklanylmagyny we daşalmagyny üpjün etmäge ýardam berýär.
“CCTV+”-niň habar bermegine görä, Hytaý möçberi boýunça rekord derejä ýetmegine garaşylýan güýzki däne satyn alyş möwsümine doly taýýarlyk gördi. Daýhanlara öz wagtynda goldaw çäreleriniň görülmegi we infrastrukturanyň döwrebaplaşdyrylmagy ýurduň azyk howpsuzlygyny üpjün etmäge ýardam eder.
