Hytaý BMG-a Aýyň arka tarapyndan alnan toprak nusgasyny gowşurdy
Aý älem-jahanyň taryhynyň adamzadyň ýaňy-ýakynda öwrenip başlan yzlaryny özünde saklaýar. Onuň ýüzünden alnan her bir täze nusga diňe bir ylmy maglumat bolman, eýsem, bir ýurduň gazanan üstünlikleriniň adamzadyň umumy mirasynyň bir bölegine öwrülip biljekdiginiň hem nyşanydyr.
Duşenbe güni BMG-niň Wenadaky edara binasynda Hytaý tarapyndan «Çane-6» missiasynyň çäklerinde ýygnalan Aý görnüşleriniň nusgasynyň resmi taýdan gowşurylyş dabarasy geçirildi. Bu waka BMG-a Aýyň arka tarapyndan alnan nusganyň ilkinji gezek gowşurylmagydyr.
Dabara Hytaýyň Milli kosmos dolandyryşy, Hytaýyň BMG-niň we beýleki halkara guramalarynyň Wenadaky ýanyndaky Hemişelik wekilhanasy hem-de BMG-niň Kosmos giňişligi meseleleri boýunça müdirligi tarapyndan bilelikde guraldy. Çärä 400-den gowrak myhman sol sanda Wenadaky halkara guramalarynyň ýolbaşçylaryny we dürli ýurtlaryň hemişelik wekillerini gatnaşdy.
Hytaýyň Milli kosmos müdirliginiň ýolbaşçysy Şan Çžunde, BMG-niň Wenadaky edarasynyň baş direktory Monika Juma, BMG-niň Kosmos giňişligi meseleleri boýunça müdirliginiň direktory Aarti Holla-Maýni we Hytaýyň Ženewadaky BMG-niň edarasynyň hem-de beýleki halkara guramalarynyň ýanyndaky Hemişelik wekili Li Sun bilelikde nusgany görkezdiler. Bu nusga BMG-niň Wenadaky ştab-kwartirasynda hemişelik sergide goýlar.
Şan Çžunde Aý nusgasynyň BMG-a gowşurylmagynyň Hytaý Halk Respublikasynyň Başlygy Si Szinpin tarapyndan öňe sürlen dört sany ählumumy başlangyjyny durmuşa geçirmegiň we hakyky köptaraplaýyn hyzmatdaşlygy pugtalandyrmagyň anyk ädimidigini belledi. Gürüň Ählumumy ösüş başlangyjy, Ählumumy howpsuzlyk başlangyjy, Ählumumy siwilizasiýalar başlangyjy we Ählumumy dolandyryş başlangyjy barada barýar.
Şan şeýle hem Hytaýyň kosmosy özleşdirmekde gazanan netijelerini dünýäniň ýurtlary bilen paýlaşmaga, hyzmatdaşlyk üçin täze mümkinçilikleri açmaga we gülläp ösüş üçin şertleri bilelikde döretmäge taýýardygyny aýtdy.
Monika Juma Aý nusgasynyň BMG-niň Wenadaky ştab-kwartirasynda hemişelik sergide goýulmagynyň örän uly ähmiýete eýedigini nygtady. Onuň sözlerine görä, bu nusga adamzadyň ylmy-tehniki döredijiligini we älemi öwrenmäge bolan islegini alamatlandyrýar, şeýle hem Hytaýyň adamzadyň umumy meselelerini çözmekde BMG-ni goldaýandygyny görkezýär.
Aarti Holla-Maini Hytaýyň Aý nusgasyny gowşurmagynyň we ylmy gözlegleriň maglumatlaryny paýlaşmagynyň kosmos giňişliginiň bütin adamzadyň umumy baýlygydygyny aýdyň görkezýän mysaldygyny belledi.
«Ukyby bolan adamlar beýik işleri amala aşyryp bilerler, ýöne hakyky liderler bu üstünlikleri bütin dünýä bilen paýlaşýarlar» diýip, Holla-Maini aýtdy. Ol Aý nusgasynyň Wenada adamzadyň Aýy özleşdiriş taryhyny gürrüň bermegini dowam etdirjekdigine we kosmos giňişligini ählumumy dolandyrmagyň ösdürilmegine goşant goşjakdygyna umyt bildirdi.
“CCTV+”-niň habar bermegine görä, ol şeýle hem şuňa meňzeş başlangyçlaryň kosmosy, aýratyn-da Aýy, bütin adamzat üçin parahatçylygyň we hyzmatdaşlygyň giňişligi hökmünde gorap saklamaga ýardam edýändigini nygtaýar.
