Nançan syýahatçylygy we sarp edişi janlandyrmak üçin her aý dron şou maksatnamalaryny ýola goýdy
Şäheriň taryhy dürli görnüşlerde janlanyp biler: muzeýlerde, kitap sahypalarynda ýa-da derýanyň üstünde ýalpyldaýan yşyklaryň şöhlesinde. Tehnologiýalar medeni ýatlamalar bilen utgaşanda, asman ekrana, tomaşaçylar bolsa özleriniň ýaşaýan ýeri baradaky uly hekaýanyň bir bölegine öwrülýär. Nançan hem özüniň 3000 ýyllyk taryhyny hut şeýle usul bilen beýan etmegi karar berdi.
Şenbe güni agşam Hytaýyň gündogaryndaky Szýansi welaýatynyň merkezi Nançanda sarp edişi we syýahatçylygy höweslendirmäge gönükdirilen, her aý geçiriljek görkezilişler maksatnamasynyň başlangyjyny bolan uly göwrümli dron şousy geçirildi. Ilkinji görkeziliş şäheriň 3000 ýyllyk taryhyna bagyşlanan on sany tematik bölümden ybarat bolup, dronlar gijeki asmanda täsirli şekilleri döretdiler. Görkezilişiň ahyrynda bolsa şäheriň güli bolan açylan hytaý bägüli asmany ajaýyp şöhle bilen ýagtylandyryp, täsirli jemlenmäni döretdi.
«Dronlar Nançanyň taryhyny asmana çykardy, bu ýerde tehnologiýa bilen medeniýet örän sazlaşykly utgaşýar. Biz ýerli aýratynlyklary özünde jemleýän köp sanly şekilleri gördük. Nançanyň ýaşaýjysy hökmünde men muňa örän buýsanýaryn» diýip, tomaşaçylaryň biri Weý Feý aýtdy.
Şou on müňlerçe tomaşaçyny özüne çekip, golaýdaky dükanlara gelýänleriň sanynyň artmagyna sebäp boldy. Şeýle hem myhmanhanalar otaglara bolan bronlaryň we maglumat almak üçin edilýän jaňlaryň sanynyň düýpli artandygyny habar berdiler. «Otaglaryň dolulyk derejesi adaty dynç günleri bilen deňeşdirilende 30,3 göterim ýokarlandy, derýanyň görünýän otaglaryň ählisi diýen ýaly öňünden bron edildi. Kabul ediş bölümimize maglumat almak we bron etmek boýunça ep-esli köp jaň geldi» diýip, myhmanhananyň dolandyryjysy Çžuo Hua aýtdy.
Şäher häkimiýetleri her aý geçiriljek görkezilişleriň medeni miras baradaky hekaýalary häzirki zaman güýmenjeleri bilen utgaşdyrýan syýahatçylyk brendine öwrüljekdigini, munuň ykdysadyýeti höweslendirmäge we myhmanlaryň täsirlerini gowulandyrmaga hyzmat etjekdigini mälim etdiler.
“CCTV+”-niň habar berşi ýaly, Nançanda her aý geçiriljek dron şou maksatnamasynyň ýola goýulmagy häzirki zaman tehnologiýalarynyň bir wagtyň özünde medeniýete hem-de ykdysadyýete hyzmat edip bilýändiginiň mysalyna öwrüldi. Taryhy mirasy täsirli görkezilişler bilen utgaşdyrmak diňe bir syýahatçylary özüne çekmän, eýsem ýerli telekeçiligiň ösmegine durnukly itergi berýär.
