Awgust aýynda Hytaýdan awtoulag eksporty yzly-yzyna üçünji aý bir milliondan geçdi
Hytaý awtoulaglarynyň eksportynyň ösmegi diňe bir sanlardan ybarat däldir, eýsem dünýä senagatynda bolup geçýän düýpli üýtgeşmeleriň beýanydyr. Haçan-da bir ýurt diňe önüm öndürmek bilen çäklenmän, aýratyn-da täze energiýa çeşmeleri pudagynda standartlary hem kesgitläp başlanda, bu tehnologik paradigmalaryň üýtgeýändiginiň alamatydyr.
Hytaýyň Awtoulag öndürijiler assosiasiýasynyň penşenbe güni çap eden maglumatlaryna görä, awgust aýynda Hytaýdan 1,01 million awtoulag eksport edildi. Bu geçen ýylyň degişli aýy bilen deňeşdirilende 65,3 göterim ösüş diýmekdir. Şeýlelikde, awtoulag eksportynyň möçberi yzly-yzyna üçünji aý bir milliondan geçdi. Awgust aýynda Hytaýyň awtoulag bazarynda täze energiýa ulaglarynyň (NEV) agdyklyk edýän orny has-da pugtalandy. Täze energiýa ulaglarynyň satuwy täze awtoulaglaryň bir aýlyk umumy satuwynyň rekord derejedäki 60,6 göterimini emele getirdi.
Maglumatlara görä, geçen aý täze energiýa ulaglarynyň önümçiligi we satuwy degişlilikde 1,65 milliondan we 1,64 milliondan geçdi. Bu görkeziji geçen ýylyň degişli döwri bilen deňeşdirilende degişlilikde 18,9 göterim we 17,8 göterim ýokarlandy. Geçen aý Hytaýdan täze energiýa ulaglarynyň eksporty geçen ýyl bilen deňeşdirilende 1,3 esse artyp, 526 000 birlige ýetdi. Şeýlelikde, täze energiýa ulaglarynyň eksportynyň möçberi yzly-yzyna üç aýyň dowamynda Hytaýyň umumy awtoulag eksportynyň ýarysyndan gowragyny düzdi.
“CCTV+”-niň habar berşi ýaly, eksportyň we täze energiýa ulaglarynyň paýynyň çalt ösmegi Hytaýyň awtoulag senagatynyň dünýä bazarynda öňdebaryjy orunlary ynamly eýeleýändigini görkezýär. Elektrik ulaglaryna we innowasiýalara edilen maýa goýumlary bolsa göze görnüp duran netijelerini berýär.
