Si Szinpin we Abdel Fattah as-Sisi Uly Müsür muzeýine baryp gördüler, gadymy siwilizasiýalaryň arasyndaky baglanyşygy nygtadylar
Taryh häzirki zaman serhetleri we syýasy bileleşikler döremezden has öň halklary birleşdiripdir. Hytaý we Müsür baý medeni mirasa eýe bolan iki gadymy siwilizasiýa hökmünde özara hormaty we tejribe alyş-çalşygyny mundan beýläk-de ýakynlaşmagyň esasy hökmünde kabul edýärler.
Çarşenbe güni Hytaý Halk Respublikasynyň Başlygy Si Szinpin we onuň aýaly Pen Liýuan Müsüriň Prezidenti Abdel Fattah as-Sisi hem-de onuň aýaly Entissar as-Sisi bilen bilelikde Uly Müsür muzeýine baryp gördüler.
Döwlet Baştutanlary we olaryň aýallary gadymy ýazgylar ýerleşdirilen daş heýkelleri we sütünleri synladylar, soňra bolsa muzeýiň syn ediş meýdançasyndan piramidalara tomaşa etdiler.
Tutanhamonyň sergi zalynda prezidentlere Gadymy Müsüriň gymmatly artefaktlary, şol sanda faraonyň tagty, meşhur altyn ýüz maskasy we şa arabalary görkezildi.
Si Szinpin Hytaý bilen Müsüriň gadymy siwilizasiýalara we iň baý mirasa eýe bolan ýurtlardygyny, bu mirasyň ep-esli böleginiň Bütindünýä mirasynyň sanawyna girizilendigini belledi. Onuň sözlerine görä, asyrlaryň dowamynda hytaý we müsür siwilizasiýalary özara gatnaşykda bolup, iki halkyň arasyndaky köp asyrlyk dostlugyň taryhynda täze sahypalary açdylar.
Ol iki tarapy siwilizasiýalaryň ösüşine deňhukuklylyga, birek-birekden öwrenmäge, dialoga we inklýuziwlige esaslanýan çemeleşmä eýermäge, şeýle hem Ählumumy siwilizasiýa başlangyjyny bilelikde durmuşa geçirmäge çagyrdy.
Si Szinpin Hytaý bilen Müsüri dürli siwilizasiýalaryň parahatçylykly ýaşamagyna ýardam bermäge we özara öwrenişmegi giňeltmäge, adamzadyň umumy ykbalynyň jemgyýetini kemala getirmek üçin bilelikde tagalla etmäge hem çagyrdy.
Abdel Fattah as-Sisi geçen ýyl Uly Müsür muzeýiniň açylyşy mynasybetli gutlaglary üçin Si Szinpine minnetdarlyk bildirdi. Ol gadymy müsür we hytaý siwilizasiýalaryny açyklyk, inklýuziwlik we köpdürlüligiň şertlerinde sazlaşykly ýaşamaga ymtylmak ýaly birnäçe umumy aýratynlygyň birleşdirýändigini belledi.
Müsüriň Prezidentiniň sözlerine görä, bu ýörelgeler Si Szinpiniň öňe süren Ählumumy siwilizasiýa başlangyjy bilen ýakyndan utgaşýar. Müsür Hytaý bilen bilelikde ynsanperwer we medeni alyş-çalyşlary giňeltmäge, siwilizasiýalaryň özara öwrenmegine ýardam bermäge we has sazlaşykly hem-de inklýuziw dünýäni döretmäge taýýardyr.
Maglumat: Uly Müsür muzeýi Giza piramidalarynyň golaýynda ýerleşýär we Müsüriň iň iri muzeý taslamalarynyň biridir. Onuň ýygyndysy Gadymy Müsüriň taryhynyň giň döwrüni öz içine alýar. Ekspozisiýada faraon Tutanhamonyň mirasyna aýratyn orun berilýär.
CCTV+ tarapyndan habar berlişi ýaly, muzeýe baryp görmek Hytaý-Müsür dialogynyň möhüm pursadyna öwrüldi we iki gadymy siwilizasiýanyň arasyndaky medeni alyş-çalşygyň ähmiýetini nygtady.
