Pekinde Bütindünýä robototehnika maslahaty – 2026 açyldy
Robotlar indi geljegiň hyýaly bolmagyny bes edýär — olar eýýäm biziň daş-töweregimizde bar we olaryň gündelik durmuşymyzdaky orny barha adaty ýagdaýa öwrülýär. Zawodlaryň önümçilik konweýerlerinden başlap, aşhanalara we hassahanalara çenli maşynlar gündelik durmuşymyza barha ynamly aralaşýar. Emma hakyky täsinlik olaryň näme edip bilýändiginde däl-de, gural bilen kömekçiniň, mehanizm bilen hyzmatdaşyň arasyndaky araçägiň nähili çalt ýitip barýandygydadyr. Pekindäki maslahat diňe gazanylan üstünlikleriň sergisi bolman, eýsem emeli aň we mehatronika bilen hyzmatdaşlykda adamzadyň geljeginiň nähili boljakdygynyň kesgitlenýän meýdançasydyr.
Her ýylda çäräniň esasy wakalarynyň biri robototehnikanyň ulanylyşyny öwrenmek boýunça Ählumumy maksatnamanyň işe girizilmegi boldy. Bu başlangyç robototehnika ulgamynyň öňdebaryjy öndürijilerini iň gowy innowasion toparlar bilen birleşdirer. Täjirçilik taýdan öndürilýän robotlaryň, şol sanda adamşekilli robotlaryň, dört aýakly robotlaryň we çeýe hereket edýän robotlaşdyrylan elleriň hakyky şertlerde mugt synagdan geçirilmegi üçin olaryň alyş-çalşygyny höweslendirer. Munuň esasy maksady robotlaryň täjirçilik taýdan ulanylyşa girizilmegini çaltlandyrmakdyr. Maslashat bilen bir hatarda sarp edijiler üçin robotlaryň festiwaly hem geçiriler. Festiwalda ilkinji gezek «Robot-söwdaçylaryň köçesi» hödürlener. Bu ýerde robot-aşpezler söwda edýän myhmanlara hyzmat ederler.
Maslahata Hytaýyň robototehnika pudagynyň dünýä giňişliginde dowam edýän ösüşiniň şertlerinde geçirilýär. Senagat we maglumat tehnologiýalary ministrliginiň maglumatlaryna görä, 2026-njy ýylyň birinji ýarymynda dünýäde satylan dört aýakly robotlaryň takmynan 70 göterimi hytaý kompaniýalarynyň paýyna düşdi. «Şu ýylyň birinji ýarymynda iri robototehnika kompaniýalarynyň girdejisi 165,5 milliard ýuana (24,5 milliard ABŞ dollaryndan gowrak) ýetdi. Bu geçen ýyl bilen deňeşdirilende 24,5 göterim köpdür. Biz esasy düzüm böleklerine we janly gurşawda hereket edýän aň düşünjesine ünsi jemläris, ylmy barlaglar bilen önümçiligiň arasyndaky baglanyşygy üpjün ederis, şeýle hem täze ulanyş ugurlarynda giň gerimli ornaşdyrmagyň hasabyna tehnologiýalaryň döwrebaplaşdyrylmagyny çaltlandyrarys» diýip, Senagat we maglumat tehnologiýalary ministriniň orunbasary Sin Gubin maslahatyň açylyş dabarasynda aýtdy.
Hytaýyň robototehnika pudagy täsirli ösüşi görkezýär: pudaklaýyn birleşikleriň maglumatlaryna görä, 2025-nji ýylda bazaryň möçberi 200 milliard ýuandan geçdi, 2030-njy ýyla çenli bolsa bu görkezijiniň 500 milliard ýuana ýetmegine garaşylýar. Hytaý kompaniýalary tarapyndan öndürilen dört aýakly robotlar ygtybarlylygy we elýeterliligi sebäpli diňe bir Aziýada däl, eýsem Ýewropada we Demirgazyk Amerikada hem eýýäm uly meşhurlyk gazandy. Şol bir wagtyň özünde, hyzmat robototehnikasynyň ösüşiniň indiki tapgyry hökmünde görülýän adamşekilli platformalar hem işjeň ösdürilýär. Bäş gün dowam etjek çärä geçen ýyl bilen deňeşdirilende 69 göterim köp, ýagny gatnaşyjylaryň sany 300-den geçdi. Olar robototehnikanyň önümçilikde, saglygy goraýyşda, bölekleýin söwdada, adatdan daşary ýagdaýlarda halas ediş işlerinde we beýleki ugurlarda ulanylyşyna bagyşlanan dört pawilýonda 3000-den gowrak eksponaty görkezýärler.
“CCTV+”-niň habar berlişi ýaly, 2026-njy ýylyň Bütindünýä robototehnika maslahaty diňe bir Hytaýyň tehnologik öňdebaryjylygyny görkezýän çäre bolman, eýsem halkara hyzmatdaşlygy üçin hem möhüm platforma öwrüldi. Robototehnikanyň ulanylyşyny öwrenmek boýunça Ählumumy maksatnamanyň işe girizilmegi dünýäniň dürli künjeklerindäki startaplar we ylmy-barlag merkezleri üçin täze mümkinçilikleri açýar. Öňümizdäki ýyllarda robotlaryň barlaghanalardan hakyky ykdysadyýete geçişiniň has-da çaltlaşmagyna garaşmak bolýar. Bu bolsa önümçiligiň, logistikanyň we gündelik hyzmatlaryň keşbini üýtgeder. Gelejek biziň pikir edişimizden has çalt gelýär we Pekin ýene-de bu ösüşiň merkezinde durýar.
