Çžuhaýda täze balykçylyk möwsümi deňiz önümleri festiwaly bilen başlandy
Ýekşenbe güni her ýyl geçirilýän balykçylyk gadagançylygynyň tamamlanmagy bilen täze balykçylyk möwsümi başlandy. Hytaýyň günortasyndaky Guandun welaýatynyň Çžuhaý şäherinden balykçy gämileriniň flotlary deňze çykdy. Täze möwsümiň ilkinji tutumlaryny dadyp görmek isleýän Hytaýyň dürli künjeklerinden, şol sanda Gonkongyň we Makaonyň ýörite administratiw sebitlerinden gelen syýahatçylary uly deňiz önümleri festiwaly özüne çekdi.
Gadymy döwürlerden bäri deňiz kenarýaka şäherlerini azyk bilen üpjün edip gelýär. Balykçylaryň uzak arakesmeden soň deňze gaýdyp gelmegi zähmeti, däp-dessurlary we umydy birleşdirýän baýramçylyk hökmünde bellenipdir. Häzirki wagtda bu däp şol bir wagtyň özünde ajaýyp syýahatçylyk çäresine öwrülýär. Ol deňiz baýlyklaryna aýawly çemeleşmegiň we tebigatyň eçilýän nygmatlaryndan lezzet almagyň biri-biri bilen aýrylmaz baglanyşyklydygyny ýatladýar.
Günorta Hytaý deňzinde tomusky balykçylyk gadagançylygynyň ýatyrylmagyndan soň 100-den gowrak balykçy gämisi Hunwan Merkezi balykçylyk portundan guramaçylykly ýagdaýda deňze çykdy. Deňze çykmazdan öň balykçylar buz gorlaryny doldurmak, torlary abatlamak we ýangyç bilen üpjün etmek işlerini tamamladylar. Balykçylyk dolandyryş edaralary we deňiz häkimiýetleri howpsuzlyk barlaglaryny geçirdi. Serhet gözegçilik gulluklary bolsa Gonkongyň, Makaonyň we Guandun welaýatynyň arasynda balykçy gämileriniň päsgelçiliksiz hereket etmegini üpjün etmek üçin gümrük amallaryny ýönekeýleşdirdi.
Şol gün köp sanly myhman täze tutulyp getirilen deňiz önümlerinden dadyp görmek üçin ýörite gelenleri özüne çeken deňiz önümleri festiwaly hem geçirildi.
«[Meniň garyndaşlarym] bu ýerde mesgen tutdular we meni hem bu ýere alyp geldiler. Howa yssy, emma bu ýerdäki atmosfera has-da yssy!» diýip, myhmanlaryň biri öz täsirlerini paýlaşdy.
«Bu ýerde ajaýyp atmosfera bar» diýip, Guandun bilen serhetleşýän merkezi Hytaýdaky Hunan welaýatynyň paýtagty Çanşa şäherinden gelen syýahatçy aýtdy.
«Bu ýere Gonkongdan we Makaodan köp adam gelýär. Muny awtoduralganyň doly bolandygyndan bildim» diýip, Makaodan gelen başga bir syýahatçy belledi.
Statistiki maglumatlara görä, şu ýylky balykçylyk gadagançylygy Çžuhaýda hasaba alnan 927 balykçy gämisine we Gonkong bilen Makaonyň arasynda gatnaw edýän 569 sany hereketli balykçy gämisine täsir etdi. 16-njy awgusta çenli 1000-e golaý gämi Çžuhaýdan deňze çykyp, täze balykçylyk möwsüminiň başlanandygyny alamatlandyrdy.
Her ýyl geçirilýän möwsümleýin gadagançylyk 1-nji maýdan 16-njy awgusta çenli dowam edip, Günorta Hytaý deňziniň belli suwlarynda täjirçilik balykçylygyny çäklendirmek arkaly balyk gorlaryny goramaga gönükdirilýär. Bu tejribe birnäçe ýyl bäri ekoulgamyň durnuklylygyny saklamaga we balykçylyk möwsümi açylanda bol hasyl alynmagyny üpjün etmäge ýardam berýär.
CCTV+ agentliginiň habar berşi ýaly, Çžuhaýda balykçylyk möwsüminiň başlamagy diňe bir önümçilik taýdan möhüm waka bolman, eýsem sebitleriň arasyndaky gatnaşyklary pugtalandyran ajaýyp medeni we gastronomik baýramçylyga hem öwrüldi. Ýakyn hepdelerde içerki bazara, şeýle hem Gonkonga we Makao täze tutulan balyklaryň we deňiz önümleriniň işjeň iberilmegine garaşylýar.
