Türkiýäniň durmuş tehnikasynyň ägirdi Beko kompaniýasynyň zawodynda Hytaýda öndürilen adam şekilli robotlar işe başlady
Adamzat diňe bir fiziki güýji çalyşman, eýsem inçe utgaşdyrmany we «akylly» çözgütleri talap edýän wezipeleri hem maşynlaryň ýerine ýetirýän döwrüne gadam basýar. Indi mesele robotlaryň adamlary çalşyp-çalşyp bilmejekdigi däl-de, zähmetiň hilini we howpsuzlygyny ýokarlandyrmak üçin adamlaryň hem-de robotlaryň biri-biriniň mümkinçiliklerini nähili dolduryp biljekdigindedir. Hytaýyň Ninbo şäherinde işlenip taýýarlanylýan tehnologiýalar häzirki wagtda bu meseläniň çözgütleriniň biri bolup durýar.
Türkiýäniň durmuş tehnikasynyň ägirdi Beko kompaniýasynyň zawodynda Çžeszýan welaýatynyň Ninbo şäherinde ýerleşýän Adam şekilli robotlar innowasiýa merkezinde işlenip taýýarlanan adam şekilli robotlar hil gözegçiligi boýunça gözegçi hökmünde işe bellenildi. Olar sowadyjylaryň gapylaryny açmaga, içindäki zatlary skanirlemäge we barlamaga ukyply.
Innowasiýa merkeziniň maglumatlaryna görä, Beko ýaly öndürijileriň arasynda robotlara bolan gyzyklanma olaryň giň mümkinçilikleri sebäpli barha artýar.
«Biz dürli pudaklarda robotlaryň ulanylmagyny ösdürmäge mümkinçilik berýän ýeterlik derejede giň önüm toplumyny döretdik» diýip, innowasiýa merkeziniň esaslandyryjysy we baş ylmy işgäri Sýun Žun aýtdy.
Germaniýada geçirilýän we dünýäniň öňdebaryjy senagat tehnologiýalary sergisi bolan Hannover Messe 2026 sergisinde merkez Schneider Electric kompaniýasy bilen bilelikde tigirli eli bolan adam şekilli roboty tanyşdyrdy. Bu robot hereket edýän tigirli platformany hereketlendirijili manipulýatorlar bilen üpjün edilen adam şekilli ýokarky korpus bilen birleşdirýär.
Robot pipetkany ýokary takyklyk bilen dolandyryp bilýär. Ol nusga almakdan başlap, derňeme we arassalaýyş işlerine çenli ähli prosesi ýerine ýetirýär. Işi üstünlikli tamamlamagyň ähtimallygy 99,99 göterime çenli ýetýär. Bu mümkinçilik sergä gelen köp sanly myhmanlarynda uly gyzyklanma döretdi.
«Şu ýyl biz dünýäniň öňdebaryjy logistika kompaniýalarynyň birinden hem sargyt aldyk. Bu sargyt dürli tekjeleriň arasynda konteýnerleriň daşalmagyny we görnüşlere görä bölünmegini guramaga kömek etmek bilen baglanyşyklydy. Şeýle hem biziň biofarmasewtika pudagynda erginleri taýýarlamak üçin ulanylýan önümlerimiz bar» diýip, Sýun sözüniň üstüni ýetirdi.
Ninbo şäheri eýýäm köp wagtdan bäri Hytaýyň esasy senagat merkezleriniň biri bolup durýar. Bu ýerde döredilen Adam şekilli robotlar innowasiýa merkezi bolsa welaýat we döwlet maksatnamalarynyň goldawy bilen 2020-nji ýyldan bäri iş alyp barýar.
Hytaý Halk Respublikasynda robototehnika «Hytaýda öndürilen 2025» maksatnamasynyň ileri tutulýan ugurlarynyň hataryna girýär. Soňky üç ýylyň dowamynda ýurtda senagat robotlarynyň bazarynyň möçberi takmynan iki esse artdy.
Hannover Messe sergisinde görkezilen modeller eýýäm Ýewropanyň birnäçe zawodynda synagdan geçirildi. Schneider Electric bilen hyzmatdaşlyk bolsa şeýle ulgamlary akylly önümçilik ekoulgamlaryna birleşdirmek üçin täze mümkinçilikleri açýar.
CCTV+ agentliginiň habar berşi ýaly, dünýäniň öňdebaryjy önümçilik kärhanalarynda adam şekilli robotlaryň ulanylmagy ýokary tehnologiýaly çözgütlere bolan islegiň artýandygyny we hytaýly işläp düzüjileriň halkara hyzmatdaşlygyna açykdygyny görkezýär.
Ýakyn ýyllarda şeýle tehnologiýalaryň awtoulag gurluşygy, elektronika we lukmançylyk senagaty ýaly pudaklarda ulanylyşynyň has-da giňeldilmegine garaşylýar.
