Hytaýyň zawodlarynda enjamyň başynda işleýän robotlar
Hytaýda adam şekilli robotlar ýurduň akylly önümçilige geçişini çaltlandyrmagy bilen logistika merkezlerinden önümçilik meýdançalaryna geçýärler. Düýn henizem ylmy-fantastika ýaly görünýän adam şekilli maşynlar adamlardan has çalt zatlary saýlap başlanda, olaryň barmaklary bolsa awtoulag zawodlarynda şaýlary zergär ýaly takyklyk bilen ýygnanda, ylmy-fantastika bilen hakykatyň arasyndaky araçäk barha azalýar.
Uzak wagt bäri «dünýäniň zawody» hökmünde tanalýan Hytaý häzirki wagtda awtomatlaşdyrmagyň «dünýä barlaghanasyna» öwrülýär. Bu ýerde adam şekilli robotlar diňe bir gural bolman, eýsem önümçilik işiniň doly hukukly gatnaşyjylaryna öwrülýärler. Guançžou şäherindäki logistika merkezlerinden Pekindäki ýygnama sehlerine çenli bu maşynlar adamlaryň ornuny tutman, eýsem iň bir agyr işleri öz üstlerine alyp, adamlaryň zähmetini döredijilik we dolandyryş işlerine gönükdirmäge mümkinçilik berýär.
Robot bir sagatda 1200 bukjany işläp bilýän, geljekde bolsa onuň öndürijiligini 1600 bukja çenli ýokarlandyrmak meýilleşdirilýär. Munuň özi bolsa, täze senagat eýýamynyň eýýäm başlanandygy aýdyň görkezýär. Bu eýýam kämil takyklyk bilen hereket edýän polat şekilli robotlaryň keşbinde ýüze çykýar.
Hytaýyň günortasyndaky Guandun welaýatynyň Guançžou şäherindäki logistika merkezinde adam şekilli robotlar bukjalary kesgitlemek, almak we saýlamak üçin ulanylýar.
Logistika bilen bir hatarda, adam şekilli robotlar kärhanalarda önümçilik bilen bagly has köp wezipeleri hem öz üstlerine alýarlar.
Pekiniň E-Taun etrabynda ýerleşýän awtoulag zawodynda takyk hereketleri ýerine ýetirmek üçin adam şekilli robotlar ulanylýar. Häzirki wagtda bu sebitde 300-den gowrak robot tehnika kompaniýasy ýerleşýär we bu ýerde doly önümçilik zynjyry döredilendir. Robotlar şaýlary almak we ýerleşdirmek, çeýe gapaklary oturtmak, gutulary ýygnamak ýaly takyk amallary ýerine ýetirýärler.
Hytaý «Made in China 2025» strategiýasynyň we 14-nji bäşýyllyk meýilnamasynyň çäklerinde robot tehnika pudagyny işjeň ösdürýär. Bu meýilnamalarda önümçiligi awtomatlaşdyrmak we intellektuallaşdyrmak esasy ileri tutulýan ugurlar hökmünde kesgitlenýär.
Hytaý Halk Respublikasynyň Senagat we maglumatlaşdyrmak ministrliginiň maglumatlaryna görä, 2025-nji ýylda Hytaýda senagat robotlarynyň bazarynyň möçberi 80 milliard ýuandan geçdi. Pudagyň ösüş depgini bolsa iki belgili derejede saklanýar.
Adam şekilli robotlar diňe bir logistika pudagynda däl, eýsem saglygy goraýyşda, bilim ulgamynda we gündelik hyzmatlarda hem öwrülişik döretmäge ukyply täze ugur hökmünde görülýär. Bu ugurdaky ylmy-barlag we tejribe-konstruktorçylyk işlerine goýulýan maýa goýumlary artýar. "Xiaomi", "UBTECH" we "DJI" ýaly kompaniýalar eýýäm täjirçilik maksatly modellerini hödürlediler.
Bilermenleriň çaklamalaryna görä, 2030-njy ýyla çenli adam şekilli robotlar ammarlarda we zawodlarda adaty görnüşe öwrüler, olaryň bahasy bolsa orta göwrümli kärhanalar üçin elýeterli derejä çenli arzanlar.
Şeýle-de bolsa, esasy kynçylyk tehnologiýanyň özi däl-de, iş ýerlerini täze şertlere uýgunlaşdyrmak we işgärleri gaýtadan taýýarlamak bolup galýar. Bu meseläni kompaniýalar hem, döwlet hem çözmeli bolar.
"CCTV+"-niň habar bermegine görä, Hytaýda adam şekilli robotlaryň köpçülikleýin ornaşdyrylmagy diňe bir tehnologik tendensiýa bolman, eýsem täze senagat şertlerinde ýurduň bäsdeşlige ukyplylygyny kesgitlejek strategik saýlawyna öwrülýär. Bu täze döwürde maşynlar bilen adamlar egin-egne berip, bilelikde işlärler.
