Şençžen Aziýa-Ýuwaş ummany ykdysady hyzmatdaşlygyna taýýarlanýar
Aziýa-Ýuwaş ummany ykdysady hyzmatdaşlygynyň ykdysady liderleriniň 33-nji duşuşygynyň öňisyrasynda kabul ediji şäher Şençžen myhmanlara hyzmat etmek ulgamynda birnäçe täzelikleri durmuşa geçirýär — gijeki bazarlarda iki dilli menýulardan we meýletinçileriň hyzmatlaryndan başlap, goşlary “akylly” barlamak ulgamyna we salgytlary çalt yzyna gaýtarmaga çenli — bu çäreler daşary ýurtly syýahatçylaryň barha artýan akymyny garşy almaga gönükdirilendir. Tehnologik innowasiýalary bilen tanalýan şäher Aziýa-Ýuwaş umman sebitiniň ykdysadyýetleriniň liderlerini kabul etmäge taýýarlanýar. Şençžen muny diňe döwrebap mejlis zallary bilen däl, eýsem köçelerde, howa menzilinde we gijeki bazarlarda myhmanlary garşylaýan ownuk hyzmatlaryň her biri arkaly amala aşyrýar. Çalt ösýän bu megapolis tehnologiýa bilen myhmansöýerligiň bitewi utgaşýan şäherine öwrülýär. Emeli aň syýahatçylara terjime etmäge kömek edýär, robotlar kofeni uçuş üçin garaşylýan ýere çenli eltip berýär, goşlar bolsa ýolagçy goşlar üçin zolagyna ýetmänkä barlanylýar. Bu üýtgeşmeler diňe bir syýahatçylaryň durmuşyny ýeňilleşdirmek bilen çäklenmän, eýsem dünýä ýüzüne möhüm yşarat berýär: Hytaý açyk, amatly we ýokary derejede myhman kabul etmäge taýýardyr.
Şençžen Baoan halkara howa menzilinde daşary ýurtly ýolagçylara kömek etmek üçin emeli aň esasynda işleýän terjime enjamlary ornaşdyryldy. Daşary ýurtly ýolagçylaryň biri: «Bu örän peýdaly. Bu gowy pikir» diýip belledi. Aziýa-Ýuwaş ummany ykdysady hyzmatdaşlygynyň duşuşygyna taýýarlygyň çäklerinde Şençžen gümrük gullugy halkara uçuşlarynyň geliş zolagynda ilkinji gezek deslapky barlag ulgamyny ulanýar. Rentgen enjamlary we KT görnüşli goş barlag enjamlary goşlary tertiplemek ulgama birleşdirildi. Bu ýolagçylar bellige alnan goşlaryny alyp ýetişmezden öň olaryň her birini barlamaga mümkinçilik berýär. Akylly şekil seljeriş ulgamynyň kömegi bilen ýokary töwekgelçilikli goşlar takyk kesgitlenýär. Kemçiligi bolmadyk goşlaryň aglabasy bolsa gümrük barlagyndan dessine geçirilýär. Bu çäreleriň netijesinde ýolagçylaryň gümrük gözegçiliginden geçmek wagty 15 minutdan hem azaldy. Gümrük taýdan resmileşdirmäniň umumy netijeliligi bolsa 60 göterimden gowrak ýokarlandy. Bu bilen hem çäklenmeýär. Hyzmatlar has-da amatly görnüşe getirildi. Eger ýolagçylar howa menzilinde bir käse kofe ýa-da çaý içmek isleseler, agyr goşlaryny göterip dükan gözlemegiň zerurlygy ýok. Olar telefon arkaly sargyt edip bilerler we 10 minutyň dowamynda robot sargydy göni garşylýan zolaga eltip berýär. Şençženiň köçelerinde meýletinçileri köp ýerlerde görmek bolýar. Ýerli häkimiýetler raýat meýletinçileri üçin edep-terbiýe we myhmansöýerlik, şeýle hem şäheriň abraýyny we keşbini tanatmagyň usullary ýaly dürli ugurlary öz içine alýan okuw kurslaryny gurady. Futýan etrabynyň gijeki bazarlarynda indi iki dilli menýular hem elýeterlidir. Daşary ýurtly syýahatçylar üçin hemme zat ilkinji seredişde düşnükli bolýar. Bu etrapda restoranlar barada iki dilli gollanmalar hem taýýarlanyldy. Şeýlelikde, myhmanlar her bir dükanyň näme hödürleýändigini we haýsy tagamlaryň şol ýeriň aýratyn naharlarydygyny anyk bilip bilýärler. Daşary ýurtly syýahatçylaryň biri: «Sargyt etmek isleýän zadymyza düşünip bilmezligimizden biraz alada edýäris. Emma iki dilli, şol sanda iňlis dilindäki görnüşiň bolmagy hakykatdan-da örän gowy» diýip aýtdy. Indi daşary ýurtly syýahatçylar üçin Şençžen şäherinde söwda etmek has-da amatly boldy. Olar halkara bank kartlaryny “WeChat Pay” ulgamyna birikdirip, QR-kod arkaly töleg geçirip bilýärler. Ýurtdan çykýan mahalynda bolsa howa menzillerinde we serhet geçelgelerinde 13 dili goldaýan öz-özüňe hyzmat etmek üçin salgyt yzyna gaýtaryş terminallary arkaly ähli amallary bary-ýogy iki-üç minutda tamamlamak mümkin.
Soňky onýyllyklarda balykçylyk obasyndan dünýä derejesindäki tehnologik merkeze öwrülen Şençžen özüniň innowasiýalary bilen eýýämden bäri tanalýar. Emma Aziýa-Ýuwaş ummany ykdysady hyzmatdaşlygynyň sammitine taýýarlyk syýahatçylyk we hyzmatlar ulgamynda birnäçe täzeçilligiň ornaşdyrylmagyna güýçli itergi berdi. Şäher häkimiýetleriniň maglumatlaryna görä, 2026-njy ýylyň ilkinji alty aýynda Şençžen 6 milliondan gowrak daşary ýurtly syýahatçyny kabul etdi. Bu görkeziji geçen ýylyň degişli döwri bilen deňeşdirilende 25 göterim ýokarydyr. Şäher häkimiýetleri sammitiň geçirilýän döwründe myhmanlaryň akymynyň ep-esli artmagyna garaşýar. Şonuň üçin emeli aň esasynda işleýän terjimeçilerden başlap, sargytlary eltip berýän robotlara çenli ähli täzelikler her bir myhmanyň özüni rahat duýmagyny üpjün etmäge gönükdirilendir. Hyzmatlaryň sanlylaşdyrylmagyna aýratyn üns berilýär. Halkara töleg ulgamlarynyň birleşdirilmegi we salgytlaryň yzyna gaýtarylmagynyň ýeňilleşdirilmegi Şençženi daşary ýurtly syýahatçylar üçin iň amatly şäherleriň birine öwürýär. Meýletinçilik maksatnamalary, işgärleriň okuwlary we gijeki bazarlarda iki dilli maglumatlaryň hödürlenmegi hyzmatlaryň hilini ýokarlandyrmak boýunça toplumlaýyn çemeleşmäni görkezýär.
“CCTV+”-niň habar berişi ýaly görä, Şençžen Aziýa-Ýuwaş ummany ykdysady hyzmatdaşlygynyň liderleriniň duşuşygyna diňe diplomatik çäre hökmünde däl, eýsem dünýä öz açyklygyny, tehnologik taýdan kämilligini we serhedinden geçýän her bir adam üçin amatly şertleri döredip bilýändigini görkezmek üçin möhüm mümkinçilik hökmünde taýýarlanýar.
