Hytaý pes orbitadaky hemra internet ulgamy üçin hemralaryň 23-nji toparyny üstünlikli uçurdy
Bir raketa bilen onlarça hemra äleme uçurylanda we orbitada Ýeriň iň çetki sebitlerini hem internet bilen üpjün etmäge ukyply ulgam kem-kemden emele getirilende, dünýä täze kosmos bäsleşigine şaýat bolýar. Indi bu bäsleşik Aýda baýdak dikmek üçin däl-de, eýsem Ýeriň üstündäki sanly giňişlik üçin alnyp barylýar. Pes orbitadaky hemra ulgamlary häzirki döwürde nebit we optiki süýümli aragatnaşyk ulgamlary ýaly strategiki ähmiýete eýe bolýar. Hytaý bu ugurda öz mümkinçiliklerini yzygiderli giňeldýär. Bu ýerde her minut we her kilogram peýdaly ýük uly ähmiýete eýedir. “Long March-8A” raketa göterijisiniň döwrebaplaşdyrylmagy netijesinde onuň ýük göterijilik ukyby ýokarlandyryldy. Bu diňe bir tehniki kämilleşdiriş bolman, eýsem hemralaryň ýygy-ýygydan, ygtybarly we elýeterli görnüşde uçurylmagyna mümkinçilik berýän möhüm ädimdir.
Sişenbe güni Hytaý ýurduň günortasyndaky Haýnan welaýatynda ýerleşýän Wençan kosmodromyndan pes orbitadaky hemra internet ulgamy üçin niýetlenen hemralaryň 23-nji toparyny üstünlikli uçurdy. “Long March-8A” raketa göterijisi Pekin wagty bilen sagat 16:52-de uçurylyp, hemralary bellenilen orbita üstünlikli ýerleşdirdi. Bu uçuş “Long March-8A” raketasynyň döwrebaplaşdyrylandan soňky doly göwrümli synag missiýasy boldy. Döwrebaplaşdyrmagyň netijesinde raketanyň ýük göterijilik ukyby artdy. Bu bolsa geljekde hemralaryň uly toparlaryny ýygy-ýygydan uçuryp, orbitadaky ulgamy has çalt giňeltmäge mümkinçilik berer.
Döwlet kompaniýasy tarapyndan döredilýän Hytaýyň pes orbitadaky hemra internet ulgamy daşary ýurt tehnologiýalary, şol sanda “Starlink” bilen bäsleşmegi maksat edinýär. Şeýle hem ol uzak sebitlerde, raýat we harby awiasiýada, deňiz ulaglarynda hem-de adatdan daşary ýagdaýlarda ygtybarly aragatnaşygy üpjün etmegi göz öňünde tutýar. Geljekde bu ulgam müňlerçe hemradan ybarat bolar diýip meýilleşdirilýär. Her bir üstünlikli uçuryş bolsa bu maksadyň amala aşmagyna ýene bir ädim ýakynlaşdyrýar. Öňki modellerden tapawutlylykda “Long March-8A” raketasy täjirçilik maksatly we ýygy-ýygydan amala aşyrylýan uçuryşlar üçin niýetlenendir. Bu bolsa hemralary orbita çykarmagyň çykdajylaryny peseldýär. Taslamany işläp düzüjileriň bellemegine görä, döwrebaplaşdyrma netijesinde raketanyň peýdaly ýük göterijilik ukyby takmynan 20 göterim ýokarlandyryldy. Şeýle-de uçuryşa taýýarlyk işleri ýönekeýleşdirilip, uçuşlaryň arasyndaky wagt gysgaldyldy. Bu uçuryş şu ýyl döwrebaplaşdyrylan “Long March-8A” raketasynyň ikinji missiýasy boldy. Ýylyň ahyryna çenli hemra internet ulgamyny giňeltmek maksady bilen ýene birnäçe uçuryşyň geçirilmegi meýilleşdirilýär.
“CCTV+”-niň habar bermegine görä, Hytaýyň hemra ulgamynyň giňeldilmegi diňe bir tehnologik ösüş bolman, eýsem ýurduň sanly garaşsyzlygyny berkitjek we adaty aragatnaşyk elýeterli bolmadyk sebitlerde ählumumy internet hyzmatlaryny giňeltjek möhüm strategik ädim hasaplanýar.
