Hytaýyň Moonshot AI startapy 2,8 trillion ölçegli Kimi K3 açyk çeşmeli emeli aň modelini – dünýäde iň uly açyk çeşmeli AI modelini hödürledi
Tehnologiýalar diňe az sanlylaryň elindäki monopoliýa bolmagyny bes edip, hemmeler üçin elýeterli baýlyga öwrülende, innowasiýalar has çalt ösýär we mümkinçilikleriň çäkleri has-da giňeýär. Açyk çeşme kody diňe bir ygtyýarnama däl, eýsem emeli aňy ýapyk toparyň çäginden çykaryp, her kimiň gurallary ulanyp öz geljegini gurup bilýän ählumumy döredijilik giňişligine öwürýän filosofiýadyr. Moonshot AI oýnuň düzgünlerini üýtgedýän möhüm ädim ätdi — kompaniýanyň dünýäniň iň kuwwatly modelleriniň biri bolan täze modeli indi hemmeler üçin elýeterlidir.
Penşenbe güni emeli aň tehnologiýalaryny işläp taýýarlaýan hytaýly Moonshot AI startapy özüniň iň täze Kimi K3 modelini hödürledi.
Kompaniýanyň habar bermegine görä, model 2,8 trillion ölçegden ybarat bolup, ol dünýäde açyk çeşmeli iň uly emeli aň modeli hasaplanýar.
Moonshot AI-nyň bellemegine görä, Kimi K3 ilkinji günden başlap şekilleri we wizual maglumatlary kabul edip düşünmegi goldaýar hem-de 1 million tokenlik kontekst penjiresine eýedir. Model programma üpjünçiligini işläp taýýarlamak, ylmy gözlegler, çuňňur seljermeler we multimodal maglumatlara düşünmek ýaly çylşyrymly meseleleri ýerine ýetirmek üçin optimizirlenendir.
Pekinli startapyň maglumatlaryna görä, Kimi K3 modeliniň umumy intellekt derejesi dünýäniň öňdebaryjy ýapyk çeşmeli emeli aň modelleriniň derejesine ýakyndyr.
Moonshot AI-nyň tehniki hünärmeni Fu Sýan:
«Biz modeliň ähli agram koeffisiýentleriniň (weights) başlangyç koduny açdyk we esasy tehnologiýalary gurallar toplumyna bölüp, olary jemgyýetçilik üçin doly elýeterli etdik» diýip belledi.
Esasy tehnologiýalarda gazanylýan yzygiderli üstünlikleriň netijesinde Hytaýyň açyk çeşmeli emeli aň modelleri dünýä AI ekoulgamynyň esasy üpjün edijileriniň birine öwrüldi.
Hytaýyň Maglumat senagatyny ösdürmek merkeziniň Geljegi uly pudaklary öwreniş merkeziniň ylmy işgäri Çžun Sinlun şeýle diýdi:
«Ozallar öňdebaryjy modeller esasan ýapyk çeşmeli birnäçe platformanyň elindedi. Şonuň üçin kompaniýalar diňe özlerine hödürlenýän mümkinçilikleri satyn alyp bilýärdiler. Emma häzirki wagtda kämilleşen açyk çeşmeli modelleriň peýda bolmagy bilen, kärhanalar öz maglumatlaryny, iş amallaryny we pudaklaýyn tejribelerini ulanyp, hakyky zerurlyklaryna has laýyk gelýän emeli aň çözgütlerini döredip bilýärler».
Kimi K3 modeliniň hödürlenmegi açyk çeşmeli emeli aň modelleriniň ösüşinde möhüm tapgyr boldy. Hytaý bu ugurda öz ornuny işjeň güýçlendirýär. Bütindünýä Intellektual eýeçilik guramasynyň (WIPO) maglumatlaryna görä, häzirki wagtda emeli aň pudagyndaky dünýä patent arzalarynyň 60 göterimden gowragy Hytaýa degişlidir. Bu bolsa dünýä boýunça iň ýokary görkezijidir.
Açyk çeşme kody dünýäniň dürli ýurtlaryndaky alymlara we işläp düzüjilere modeli öz maksatlaryna uýgunlaşdyrmaga mümkinçilik berýär. Bu bolsa lukmançylyk, bilim, inženerçilik we beýleki ugurlarda ösüşiň tizlenmegine ýardam edýär.
CCTV+ agentliginiň habar bermegine görä, Kimi K3 modeli emeli aň çözgütlerini başdan döretmek üçin ägirt uly çykdajy etmän, AI tehnologiýalaryny ornaşdyrmaga çalyşýan müňlerçe kompaniýa we ylmy-barlag merkezleri üçin möhüm gural bolar diýlip garaşylýar.
