Hytaýyň Changxin Memory Technologies (CXMT) mikroçip öndürijisiniň paýnamalary söwdanyň ilkinji gününde takmynan 500 göterim ýokarlandy
Hytaýyň CXMT mikroçip öndürijisiniň paýnamalary söwdanyň ilkinji gününde takmynan 500 göterim ýokarlandy. Tehnologiýa merkezindäki startap kompaniýanyň birnäçe sagadyň dowamynda bazaryň öňdebaryjysyna öwrülmegi diňe bir şowlulyk däl — bu innowasiýalara we strategik ösüşe gönükdirilen maýa goýumlaryň ýokary netije berýändiginiň ykrar edilmegidir.
CXMT kompaniýasynyň ilkinji söwda günündäki paýnamalarynyň güýçli ösüşi diňe bir maliýe wakasy bolman, eýsem ýarymgeçiriji pudagy üçin hem möhüm alamat boldy: Hytaý dünýäniň iri kompaniýalary bilen bäsleşip biljek kärhanalary döredip bilýär.
Bu ösüşiň aňyrsynda köp ýyllaryň dowamynda alnyp barlan inženerçilik işleri, milliardlarça maýa goýumlary we tehnologiýanyň geljeginiň hut şu ýerde we häzir döredilýändigine bolan bazar ynamy durýar.
Duşenbe güni CXMT paýnamalary Şanhaý biržasynyň STAR bazarynda 49 ýuan (7,20 ABŞ dollaryndan gowrak) bahada ýapyldy. Bu görkeziji kompaniýanyň 8,66 ýuan bolan ilkinji köpçülikleýin paýnamalaşdyrma (IPO) bahasy bilen deňeşdirilende 465,82 göterim ýokarlanmagy aňladýar. Günüň dowamynda söwda dolanyşygy 140 milliard ýuandan geçdi.
Söwdanyň ilkinji gününiň ahyrynda kompaniýanyň bazar maýalaşdyrmasy 3,2 trillion ýuandan ýokary boldy. Bu bolsa ony «A» derejeli paýnamalar bazarynda bazar gymmaty boýunça iň uly kompaniýalaryň hataryna çykardy.
Bu netije 2016-njy ýylda Hytaýyň gündogaryndaky Anhoý welaýatynyň Hefeý ylmy-tehniki merkezinde döredilen kompaniýa üçin uly üstünlik boldy. CXMT ykjam telefonlarda, şahsy kompýuterlerde, planşetlerde, serwerlerde we beýleki sarp ediş enjamlarynda hem-de goşundylarda ulanylýan dinamiki operatiw ýat mikroçiplerini (DRAM) öndürmek boýunça ýöriteleşýär.
Hytaýyň Global telewideniýe torunda (CGTN) işleýän Şanhaýly analitik Timoti Poup mikroçip öndürijisiniň bazara edýän ilkinji täsiri barada şeýle baha berdi:
«CXMT şu gün habar sözbaşylarynda esasy orun eýeledi we onuň birža çykmagy birnäçe gowşak hepdeden soň maýadarlaryň töwekgelçilige bolan islegini ýokarlandyryp, bazardaky ynamy güýçlendirdi.
CXMT birža çykmazdan öň ep-esli likwidlik artykmaçlygyny döretdi: maýadarlar ýa serişdelerini jemlediler, ýa-da bu ilkinji söwda gününe taýýarlyk görmek üçin beýleki paýnamalary satyn almakdan saklandylar.
Emma bazar bu uly täze paýnamalaşdyrmany üstünlikli kabul edeninden soň, şol ätiýaçlyk serişdeleriniň bir bölegi beýleki paýnamalara gaýdyp gelen ýaly boldy.
Emma CXMT kompaniýasynyň ilkinji söwda güni hakykatdan hem haýran galdyryjydy. Biz köplenç «uçuş» diýen ýaly sözleri ulanýarys, emma şu günki ýaly günlerde bu sözleriň kompaniýanyň nähili derejede ýokarlanandygyny doly beýan etmäge ýeterlik däldigine gynanýaryn. Sebäbi kompaniýa ilkinji söwda gününde 500 göterime golaý ösüp, Hytaýyň materik böleginde biržada hasaba alnan iň gymmatly kompaniýa öwrüldi.
Şeýle-de bolsa, möhüm bir ýagdaýy bellemek gerek. Häzirki wagtda kompaniýanyň paýnamalarynyň diňe 6,73 göterimi erkin söwdada boldy. Paýnamalaryň dürli toparlarynyň alty aýdan üç ýyla çenli möhletlere çenli böwetlenendigi sebäpli, bazaryň bu ägirt uly täze bahalandyrmany doly synagdan geçirmegi üçin entek wagt gerek bolar».
Bu täsirli ilkinji çykyş, umumy garaşylýan girdejisi 66 milliard ýuandan geçjek taryhy IPO döwrüni jemleýär. Şeýlelikde, bu Hytaýyň ylmy-tehniki innowasiýalar biržasynyň taryhyndaky iň uly IPO boldy.
Kompaniýanyň çaklamalaryna görä, 2026-njy ýylyň birinji ýarymynda CXMT-niň amal girdejisi 110 milliarddan 120 milliard ýuana çenli bolar. Ene kompaniýanyň paýdarlaryna degişli arassa girdeji bolsa 50 milliarddan 57 milliard ýuana çenli ýeter.
CCTV+ agentliginiň habar berşi ýaly, CXMT kompaniýasynyň üstünligi maýadarlaryň Hytaýyň tehnologiýa kompaniýalaryna bolan gyzyklanmasynyň artýandygyny tassyklaýar we bazaryň strategiki taýdan möhüm pudaklarda öňdebaryjy kompaniýalary goldamaga taýýardygyny görkezýär.
