Innowasiýalar Hytaýyň ykdysady ösüşiniň esasy hereketlendiriji güýjüne öwrülýär
Hytaýyň senagat pudagynda özgertmeler barha uly depgine eýe bolýar. 2026-njy ýylyň birinji ýarymynda ykdysady ösüşiň 40 göterimden gowragy täze ösüş hereketlendirijileriniň hasabyna üpjün edildi.
Adatça howa ýük gatnawlary üçin pes möwsüm hasaplanýan tomus aýlary bu ýyl işjeňlik döwri boldy. Şençžen şäherinden dünýäniň dürli ýurtlaryna emeli aň ulgamlary üçin niýetlenen mikroçipler, optiki modullar we gaty diskler (SSD) iberilýär. "SF Airlines" awiakompaniýasynyň wekili alty aýda emeli aň bilen baglanyşykly ýük daşamalarynyň möçberiniň iki esseden hem gowrak artandygyny aýtdy.
Şu ýylyň birinji ýarymynda Hytaýda her gün ortaça 1,5 milliarddan gowrak integral mikroshema öndürildi. Emeli aň bilen baglanyşykly üpjünçilik zynjyry bolsa eksportyň ösüşiniň takmynan ýarysyny üpjün etdi. Ylym we tehnologiýa üçin döwlet tarapyndan bölünip berilýän maliýe serişdeleri ilkinji gezek 400 milliard ýuandan geçer. Düýpli ylmy barlaglar üçin býujet bolsa 180 göterim artdy. Mundan başga-da, hökümet ylmy işläp taýýarlamalaryň önümçilige ornaşdyrylmagyny we innowasiýalaryň senagat bilen utgaşdyrylmagyny höweslendirýär.
Şu aýda Hytaý dünýäde ilkinji gezek deňizdäki tor ulgamy arkaly raketanyň birinji basgançagyny üstünlikli yzyna gaýtardy. Bu täjirçilik kosmos pudagy üçin möhüm üstünlik boldy. Bu ugurda maýa goýumlarynyň girdejililik derejesi 1:12-e ýetdi. Şeýle hem iýun aýynda strategik pudaklar boýunça patentleriň sany geçen ýylyň degişli döwri bilen deňeşdirilende ilkinji gezek 30 göterimden gowrak artdy.
Adaty senagat pudaklary hem ösüşini çaltlandyrýar. Biomateriallaryň we bioýangyjyň önümçiligi 20 göterimden gowrak ýokarlandy. Mundan başga-da, Hytaý Bütindünýä Ykdysady Forumynyň (WEF) «maýak zawodlarynyň» sany boýunça dünýäde öňdeligi eýeleýär. Dünýä boýunça şeýle 39 zawodyň 24-si Hytaýda ýerleşýär. Olaryň ýarysyna golaýy dokma, konteýner önümçiligi we durmuş tehnikalary pudaklarynda işleýär.
Emeli aň bilen dolandyrylýan robot tehnologiýalary hem çalt ösýär. Häzirki wagtda 230-dan gowrak kompaniýa adam şekilli robotlaryň 400 görnüşini hödürledi. Bu robotlaryň ýyllyk önümçiliginiň 100 müň birlikden geçmegine garaşylýar. Kwant tehnologiýalary hem ylmy barlaghanalardan önümçilige geçirilýär. Bu ugra goýberilýän maliýe serişdeleriň möçberi üç esse artdy.
Hytaýyň Milli ösüş we özgertmeler komissiýasynyň bellemegine görä, täze ösüş hereketlendirijileri indi aýry-aýry üstünliklerden ulgamyň giň gerimli ösüşine geçýär. "CCTV+"-niň habar bermegine görä, täze ösüş hereketlendirijileri 2026-njy ýylyň birinji ýarymynda Hytaýyň ykdysady ösüşiniň 40 göterimden gowragyny üpjün etdi we bu ösüş mundan beýläk hem güýçlenmegini dowam etdirýär.
